اصل المراجل ماتجي بالكلامي=فعل ٍ ينومس فالرجال المطاليق
تلقى لهم روس المعالي مرامي=ومحدقه فالطيب واشد تحديق
وانا خويّك فالسعه يابو طامي=واقيّد الخوه ليا حل ابك ضيق
طلقة يميني وقفتي فالزحامي=مانيب مقفي لو تقفي المخاليق
انا يمينك ياعزيز المقامي=لوين ماتبغى طويت الطواريق
مانــّسبت حالي بسم حر(ن) قطامي=الا من افعوله وطرح المحاليق
حملك اشيله لو يهد العظامي=مادمت حي ٍ نظرتي فالشواهيق
وانا على خوة رجالن كرامي=فيهم شهامه مجنبين المعاييق
واحرّص ودوّر الرجال الحشامي=على المعزه والمكارم مسابيق
وخابر جروحك ياصحيبي حوامي=مستوطنه في داخلك فالمعاليق
وهذي هي الدنيا ولاهي تدامي=يوم ٍ بها راحه ويوم ٍ مزانيق
احد ٍ عطتـّه امن الليال الشئامي=واحد ٍ عطتـّه امن الليال التوافيق
وختامها مني تحيه وسلامي=لك ياوريث الطيب وعز المرافيق