السلام عليكم ورحمة الله وبركاته

أهلين أخوي قرناس

والله شوف

التصميم الأول

ألوانه في الضياع

يعني اش جاب الأورنج عالبنك عالبني

غير كدا مو ماشي مع الخلفية أبدا

والكلام فوق بعضه مغطي الخلفية

وكلمة كبيرة وكلمة صغيرة وكلمة وسط وجملة فوق وحاجة تحت

غير كدا ايميلك رافعلي ضغطي قد كدا ايميل ؟؟؟

يعني مخلي حجم خط الايميل بحجم الكلام هدا لو ماكان اكبر كمان


تانيا الخلفية لو ماخاب ظني فهيا كانت صورة صغيرة وانت كبرتها صح ؟؟؟

لانها مو واضحة غلا لو كنت انت متعمد انك تخليها مو واضحة فوقتها انصحك ما تعمل دي الحركة تاني

والكلام الي في الصورة المفروض تشيله يعني ما ينفع تكون خلفيتك فيها كلام

تقوم تجي انت وتحط فوقها كلام

غير كدا لما تحط ايميلك فهوا يعتبر كتوقيع لك

فما ينفع تكتب الإسم الأول لإيميلك وتخلي بعد @ فاضي لانه في مليون شركة ايميلات

كدا حتتعب معجبينك أي نعم شركة الهوت ميل معروفة

بس مو كل الناس يعتبروها افتراضي زي حالتنا

وغير كدا بصراحة انا مني حاسة التصميم الاول فيه فن زي ماتكون صورة عجبتك

وحطيت عليها ايميلك وجملة عاجباك

دي تعليقاتي بالنسبة للتصميم الاول

أما التصميم الثاني

مرتب شكليا ومنسق حتى ألوانه لايقة

بس استفهاماته كتيرة كإنها كلمة ماخدة سطر كامل

وكمان حركة انه اكتر من نوع خط في التصميم ماتعجبني خصوصا لما تجيك في كلمة وحدة ومالها أهمية تذكر

وكمان خاصة لما تكون الخط دا اللي مفرغ من جوا وغلطت انت لما خليت لون ايميلك بلون الورد اللي وراه

لو عاجبك اللون كان عالأقل خليت الايميل متحدد بلون تاني أبيض مثلا أو أسود

ومادري انا شايفة في اسم مكتوب أظنه أمجاد

فلو كان دا الاسم انت الي حاطة كتوقيع فمايصلح توقيع وايميل

واحد منهم يفي بالغرض

ولو كان الاسم موجود فالأجمل لو انك شلته او عالأقل صغرت الايميل وخليته تحته

وبالنسبة للإيميل المفروض يكون اصغر من كدا لانه عبارة عن توقيع مو جملة في التصميم

وغير كدا المفروض يكون كامل يعني

f_99999@*******.com

وفي كل الأحوال لا تواخذني عالإطالة والله لمصلحتك لا أكثر وألا مو كسبانة حاجة

ولو زعلت مني فأنا آسفة

لكن ما ينفع الواحد يجامل

وأنا قبل كدا انتقدت تصاميم عاشق سراب... وحمود ومازعلوا

وأنا انتظر تصميمك القادم على أحر من الجمر

وأتمنى إنك تتفادى كل الأخطاء

تحياتي

... غ ...