الموضوع
:
][®][^][®][رحلهـ مع عضو ][®][^][®][
عرض مشاركة واحدة
04-02-2009, 03:03 AM
المشاركة
11
المبتسم
عضوتربع القمه
تاريخ الإنضمام :
Jun 2008
رقم العضوية :
21837
المشاركات:
1,572
رد: ][®][^][®][رحلهـ مع عضو ][®][^][®][
سلام عليكم .. وصباح الخيرات
معليش على التأخر
بس توقعتكم ما ترغبون بالي ثقافته محلية زيي
وجابك الله
ريماس
يلا سوي تسخين ،
تراك بعدي، حسب أختيار
قمر الشمال
لك
خليك جاهزة
وحسب أنظمة صاحبة الموضوع الأستاذة
قمووورة
- الي يجب ان نتقيد بها -
يومين ثم هاتي مشاركتك
اتفقنا ريم
؟!
طيب حلو
أعود للموضوع :
_
أول سفرة لكـ كانت..متى؟....إلى؟
أعتقد وعمري 10 سنوات لمكة المكرمة ..
_أطول سفرة كانت لمدة....؟
امممممممم
ما أتذكر بالضبط
لكن يمكن 15 يوم
>>> أمل بسرعة
_
أحلى بلد زرته؟...ما الذي شدك إليه
؟
أحلى بلد - طبعا داخليا - كمناظر فهي أبها، وجزيرة فرسان،
وكراحة نفسية وروحانية طبعا مكة .
بخصوص ابها الجو، والطبيعة الساحرة كالجبال والأشجار والمياه ، وفرسان بحرها وشواطئها روووعة
أما مكة فطبعا الحرم الشريف ، لاحرمني الله وإياكم مداومة زيارته .
_لو شاءت الظروف (عمل...زواج... مثلا) أي بلد غير بلدكـ كنت تتمنى تعيش فيه؟
صعب الابتعاد عن الأرض الي تربيت فيها ، والي فيها ربعك وأقاربك،
فيبدو لي ليس من السهولة ترك الرياض .
_
أكلة تحب اذا زرت دولهـ تذوقها؟
أحب المأكولات البحرية بأنواعها، وقل أن أزور بلد فيها بحر إلا ولازم البحري ع مائدة الطعام
_
طرفة صارتلك في احد أسفارك و لازلت تذكرها
؟
امممممممممممم
الطرف كثيرة لكن منها :
1- أتذكر كنا في جبل فيفا نتمشى، كانت المنطقة هناك خطرة شوي والطريق ضيق وما فيه حواجز
!
المهم مرينا من عند منظر رهيب، وشفا مرتفع ارتفاع شااااهق،
قربت السيارة على بالي بخوف الي معي >>> تهور مراهق
طبعا خافوا وصارخوا .. وخفت أنا معهم
المهم وقفت السيارة ونسيت أمسك البريك ( الجلنط )
نزلوا الي معي ، ونزلت بسرعة ابي أتفرج على المنظر
ما دريت إلا والسيارة تمشي شوي شوي نحو حافة الجبل
!!!
توهقت أنا
لأنه ما يمديني أسوي أي شي !
متحمسين مع الموقف ؟!
أكمل وإلا أخلي التكملة في الحلقة القادمة ؟
>>> مايعرف يتميلح
ههههه
اي
جاب الله ولد أختي كان قريب للسيارة ركب ع طوووول ومسك البريك - الحمد لله - والا كان راحت السيارة في خبر كان
!
عقبها صرت أمسك البريك قبل أوقف من الخوف! من جد خوف
طيب تبون موقف ثاني ؟!
أبشروا
غالين والطلب رخيص
اممممممممممم
اي
- في أبها قالوا الأهل نبي ( تيس ) نبي نسويه مندي غداء،
طبعا رحنا للسوق وندور هالتيس لفينا السوق وجلسنا نبحث عن واحد لقطة
يعني متعوب عليه راهي وعمره مناسب،
لقينا واحد زي الحلاوة، وكان سعره بعد أغلى من غيره ..
شريناه وجبناه معنا في منتزه الدلغان
وكنا مبسوووووطين عليه ،
كلنا مجوعين أنفسنا نفكر بالمندي بس
كنا رابطينه في شجرة جنبنا
ولما حانت ساعة الذبح وتجهيز المندي..
هاه متحمسين أنتم وإلا قاعد أكلم نفسي أنا ؟!
طيب حلو
تعجبوني كذا
أحب الي يهتم ويقرا ويقدر إني أكتب على شانه
>>> اقول لايكثر بس
اي
اقولكم لما جينا نذبحه، توقعناه مثل تيوسنا في الرياض زلايب ما يسون أي شي
ولو سون نقدر نسيطر عليهم بكل سهولة
كان هو نشيط ( وش خليتوا رابي في الجنوب )
ع فكرة أحب أهل الجنوب كرم وأخلاق وطيبة
- مو مجاملة ..
أيوه
أقولكم لما فكينا الحبل حقه مادرينا إلا وهو يهرب !!!
بداية قاعدين نتفرج توقعنا الأمر بسيط
!
لحقه واحد والثاني والثالث إلا والتيس يجري بشكل ! كنه غزال
حتى فزعوا معنا بعض الناس الي حولنا في المنتزه
ركضنا خلفه وبين هالجبال وهالأشجار تعبنا مررررة
اي بس .. وعجزنا عنه ووقفنا من التعب
وهرب التيس بكل سهولة
وضاع المندي
واقرب مطعم رز بخاري
تبون موقف ثالث والا يكفي ؟!
>>> ما ينعطا وجه تراه
بس تكفون هالواحد ..
قصيييير بعد
هاه أقول ؟!
طاااايب ومشكورين على كرمكم الحاتمي
اي مرة كنا رايحين نتمشى في الشمال
كنا جايين من العلا تيما على تبوك
بالعودة رجعنا عن طريق دومة الجندل سكاكا
من تبوك لدومة الجندل كان الطريق طويل وضيق وسيء وما فيه أمن طرق
وشبه خالي من المسافرين أو المحطات
!!!
وعلى جنباته كانت الأرض رمل
كان معانا جمس
في منتصف الطريق قال السواق وش رايكم نوقف شوي نريح ؟!
كان الوقت بعد العصر..
قلنا
يلا وش ورانا
طبعا المنطقة نجهلها تماما ونجهل أرضها
نزل خوينا عن السفلت، دخل جوا في الرمل شوي إلا ويقول الجمس هذا مكاني ( غرز )
تغريزة شيييييييينة
حاولنا فيه عجزنا
ساعتين ما مر ولا سيارة !!!
أذن المغرب ما طلعنا !!!
على فكرة حتى جوال ما كان فيه ذاك الوقت !
اي لما حسينا بالجد قصدي الخوف
>>> يبدو جتنا قوة إضافية
المهم وبعد محاولات مضنية وتعب وقلق طلعنا بفضل الله
وكلنا قمنا نهوش على السواق
لا عمرك تقول بوقف أرتاح
ويلا.. لا توقف أبدا إلا في الدومة
وإلا بعد في الرياض !
وبس..
تبون موقف رابع ؟!
>>> طرااااااع كف من قمووورة ..
ههههههه
لا عاد مو حلا.. خلاص في مناسبات أخرى بإذن الله
_
أجمل تذكار محتفظ فيه من اي دولهـ...
؟
وشو تذكار قموورة
؟! يعني هدية مثلا؟!
امممممم
ساعة من أندونيسيا ..
_
نبي صورهـ لدولهـ تتمنى زيارتها
...؟
^
تركيا
_
اجمل مكان شفتهـ بسفركـ
...؟
طبعا داخليا وادي لجب في فيفا .. وابحصوا بقوقل تشوفون الصور ..
_
كم مرهـ سافرت بحياتكـ
...؟
ويييييين مرة كثير، طبعا أقصد داخل المملكة .
_
دولهـ عجبكـ التسوق فيها
...؟
البطحاء في الرياض
_
آخر بلد زرتهـ ...
؟
جدة .
_شيء لا تستغني عنه في سفرك طبعا بعد القران الكريم...
؟
أحب آخذ معي الفرشة حقتي، وكمان عطري ودهني العود
وأشياء خاصة بعد ككتب مفيدة وكميرا فيديو ومقص ومشط ... إلخ
_
أجمل مطار شفتهـ
..؟
هو أنا شفت مطارات أصلا ؟!
ههههههه
أمزح
مطار الملك خالد في الرياض من جد روعة، أنا
شفت مطارات دولية، هو أفضل منها بمراحل
.
_كلمة{أو نصيحة} أخيرة للمسافرين وقسم اللسياحهـ والسفر؟
ما فمهت هالسؤال زين
أنا أبي نصيحة منكم .. لكن
أهم شي أن الواحد في السفر يحافظ على عباداته ودينه،
وينظم وقته، ويحاول يستغل كل دقيقة فيه، ولا ينسى التوثيق بكميرا الفيديو
أيضا حلو الواحد يصطحب معه بعض الكتب - بالإضافة للقرآن - ويستغل قراءتها وقت الفراغ أو في الطريق مثلا .
اممممممم
وبس .. هذا الي على البال الحين .
شكرا لك
قمورة
على استضافتك لأخيك المتواضع
المبتسم
..
أتمنى إني كنت ضيف خفيف عليكم، وأن تكونوا سعدتم مع
المبتسم
>>>
مصدق إنه مميز
وهذرته الواجدة
>>> أحسن من قالكم تختاروني
؟!
روحوا طقوا قمورة
ويسرني أن أشاهد تعليقاتكم واستفساراتكم
ويا هلا وغلا فيكم جميعا
..
وقبل أنهي مشاركتي أعيد وأذكر :
استعدي يا
رموسة
بعد يومين