عذرك معك ياللي عن العين غايب=وأنا أدري انه لو هو بيدك ما غبت
الحظ خاب ودايم الحظ خايب=وان خاب حظي معك معي انت ما خبت
انت المقرب وأقرب من القرايب=بالحب همّ اجناب وانته تقربت
لو شفت غيرك من طوال الذوايب=ما ذبت فيهم وأنت في طلّتك ذبت
يا طيبك بقلبٍ بطاريك طايب=قلبا على عرشه عليت وتنصبت
على كثر ما مرني من مصايب=نسيتها والحين من بعدك انصبت
رحلت عن عيني بليا سبايب=وأنا احترق لاني ما حس أني أذنبت
متمرداً فالحب ما كنت هايب=واليوم من طوله بعادك تأدبت
مكبوت واجذب ما تجيب الهبايب=ولا قدرت انسم ولا اسلم من الكبت
انبتني بالحب وأنت السحايب=وما دام رحت وغبت من يسقي النبت
من تاب عن ذنبه يخاف العقايب=يا مذنباً فيني تبي تموت ما تبت
ارجع ورجع ذكريات الحبايب=ذكرى نراجعها من السبت للسبت
ولانته بمعذورٍ اليا ابطيت غايب=وأنا أدري انه لوك تحب ما غبت