منتديات الأماكن - عرض مشاركة واحدة - تحب الاماكن تبيها افضل .. وش تبي نسوي عشان تكون مبسوط

22-04-2012, 03:05 PM

المشاركة 62

abud3d



رد: تحب الاماكن تبيها افضل .. وش تبي نسوي عشان تكون مبسوط

اقتباس المشاركة الأصلية كتبت بواسطة ][ سعد الرجه ][

وعليكم السلام ورحمة الله وبركاته

كويس أخوي أبو يزيد .. إنك أخذت الربع وقلطتهم هنا أوسع << نشب بالمعازيم

أظن أول خطوه زي ما تفضل الأخ الفاضل كحيلان11
ومثل ما انت طلبت اقتراحات بخصوصها .. هي إعادة هيكلة المنتدى

لأن زي ما تعرفون .. كل ما كثرت الأقسام قلت بركتها
العضو يدخل المنتدى وينقلب راسه وين يروح وكل ما طل في قسم ما يشوف الا موضوع موضوعين نشطه

وكل ما صار عددها أقل .. صار فيه فرصه للي يدخل المنتدى لأوقات محدوده إنه يمر على أغلبها لو حب

لهالسبب .. لي كم اقتراح في تقليص الأقسام .. يمكن تفيد لو اتفقتوا عليها .. وإن شا الله تتسع صدوركم لذا الشقلبه :d

( السلطة الرابعة )
أخبار يشوفها المتابع في كل مكان بفضل انتشار وسائل التقنيه الحديثه وسرعة معرفة الأحداث
وفي الأخير التفاعل بالردود ما راح يتعدى كلمات مجاملة مثل : يعطيك العافيه .... يسلمو ع النقل .. وطقتها

إلغائه في رأيي راح يعطي الفرصه لأختنا أم عبدالرحمن الله يعطيها العافيه .. أو أي مشرف آخر يتولى القسم .. ويوفر عليهم الوقت لبذل الجهد في قسم ثاني وبشكل مفيد أكثر

قسم ( يحكى أن ) .. يعتبر قسم ( مدفون ) في ذائقة عذبة المختص غالباً بالشعر والخواطر المنقوله
برايي لو يدمج مع ( المكتبة الثقافية ) ويسمى مثلاً ( قسم الثقافة العامة ) أو أي مسمى آخر .. ويضاف لها ( تطوير الذات ) وتصير كلها أقسام تحت منتدى ( التربيه والتعليم )

اتفق مع الأخت غسق .. ولأن الأماكن منتدى عام وشامل ومو منتدى تقني متخصص
فالأفضل دمج منتديات ( الأجهزة الذكية ) في قسم واحد تحت منتدى ( ترانيم الجوال ) مع تغيير المسمى حتى يكون شامل لها كلها

مع ملاحظة إن قسم ( الماسنجر ) قلت أهميته بانخفاض شعبية الماسنجر في الوقت الحالي بوجود الواتس اب وأمثاله من برامج التواصل
فإلغائه أيضاً فكره تحتاج وقفه منكم وقرار

منتدى ( عالم السياحه ) فيه قسم ( المقاهي والمطاعم )
أشوفه ما يتعدى كونه دعايه مجانيه لبعض المطاعم والمقاهي .. وإلغائه راح يخفف العبء على مشرفي القسم
ولا يزعلون علينا الناس الإكيله

وعلى طاري الأكل .. منتدى ( أحل لكم الطيبات ) .. فيه قسمين إضافيين .. لو تلغى القسمين وتكون كلها منتدى واحد .. ترى الدعوى كلها لفلفة أكل << هين بتجيك قدور المطبخ على دمجتك

منتدى ( صدى الملاعب ) .. بأقسامه الأربعه !!
المشاركات فيه محدوده جداً .. ومن أعضاء معروفين يعدون على الأصابع ومشكورين على حماسهم وجهدهم

وبسبب المشاكل الكبيره اللي نعانيها من التعصب في مجتمعنا بشكل عام بسبب الرياضه .. والاستفزازات والردود المتشنجه بين البعض في فترات سابقه وكانت تزيد من الردود المسيئه حتى ابتعد البعض بسببها

وبدون محد يزعل لأن الكلام مو موجه لأحد معين .. نتكلم بشكل عام .. وعشان المنتدى للالتقاء والارتقاء .. وما حنا بحاجة مشاحنات وزعل بسبب كوره .. و(صدى الملاعب) أصلا خامل هو وأقسامه الخاصه بالأنديه .. إلا من بعض المشاركات
وبقائه بهالشكل ما خدم المنتدى .. وماسك خانه ع الفاضي << زي بعض اللاعبين الكديش

لو يلغى .. أو ع الأقل .. تلغى أقسامه ويبقى منتدى واحد خاص بالرياضه

السؤال اللي ما لقيت له إجابه صراحه هو :

شلون قسم مثل ( الطرائف والنكت ) يكون خاص ومغلق للي خارج المنتدى .. وبنفس الوقت أقسام فيها إبداعات أعضاء وكتاباتهم الخاصة وقصائدهم مثل ( تراتيل روح ) و ( وزن وقافية ) و ( الأماكن العام ) .. مفتوحه للزائرين .. حتى قبل إيقاف النسخ من المنتدى؟!

ودي أعرف .. ش ذا اللي في قسم الطرائف تخافون عليه عشان ينصك على أهله؟!

شخصياً .. أشوف دمج ( اللاند ) مع ( الطرائف والنكت ) في منتدى واحد .. أي واحد منهم يكون رئيسي والثاني فرعي تحته

( صور وعجائب عالم الحيوان ) لو وضع ضمن أقسام ( فتنة الضوء ) .. يكون حصرتوا الصور كلها في منتدى واحد أفضل

هذا اللي أشوفه برايي المتواضع بخصوص إعادة الهيكله .. والأمر في الأخير في أيديكم واللي تقررونه

وإن شا الله ما كثرت عليكم

وفق الله الجميع لكل خير

معاً لأماكن أفضل

™ تشاوو .. يرحمكم الله

هلا بك ونور الموضوع

وكل هاللي حصل لم يحصل الا بمادرتك القيمه اخوي سعد

تم اعادة هيكلة المنتدى وان شاء الله نكون افضل

بالنسبة لفتح قسم اللاند ابشر راح نفتحه للزوار

كل الود

رد مع الإقتباس