طيّب ..
دريت إنك مع غيري الحين!
يعني بـ ظنّك لادريت آتحسّرْك ؟!

يا شاغله نفسك بقلبي ..
وبعدين؟
عيشي حياتك واتركي ما يساورْك

عيشي..!
عسى الله يسعدك واتّهنّين
منتي بـ ملهمتي.. ولا عدْت شاعرْك!

لكن .. لو إنّك لاقيه من تحبين؟
كوني (حبيبه).. عكس ما كنت خابرْك

كوني بضيقات الصدر له ميادين
يطلق عنان البال في وسْع خاطرْك

كوني لصحراه المطر .. لا تكونين
شمس الجفاف وتحرقي باقي أخضرْك

وبلّي عروقه من حنانك .. تشوفين
وشلون ينبت في شعوره .. ويثمرْك

وْلا تكثر أعذارك عليه وتغيبين
لا تقتلي روح الرضا في تكبَرْك

وْلا من حكيتي حطي العين بالعين
وخليك مره صادقه في مشاعرْك !

وْلا يشغلك ذِكْري.. وياليت تنسين
مادام من خُبْرك وأنا ناسي أذكرْك!

عبدالله الظفيري