يالله حي الجميع 
الموضوع مخصوص لأخواتنا الجنس الناعم .. وما يمنع إن الجنس الحرش
.. اللي هو الخشن .. يطالع ويستفيد عشان ياخذ حذره
وكل وحده ودها تتعلم الحركات .. تنسف ذرعانها .. وتربّط قرونها على دمجتها << وين شماغ؟ شوي تقول تسوي بنت البكار بالقرون>> وتركز زين
.. وتفتح عيونها ع الاخر .. بدون ما تطيّر البوهه وتسكر فمها عشان ما ودنا بزود سعابيل على الكيبوردات بليز
المهم تعتبر نفسها تتفرج في مسلسل خليجي جديد << عشان قوة التركيز في الملابس والديكورات وما يجيبون خبر أم أحداث المسلسل
اهم شي ما تخلي مجال للمعتدي إنه يمعط الكشه
.. وإلا يجوّدها بقرونها .. ويسوي بها
حركات جاكي شان بالسلسله
ويرجى اتباع التعليمات جيداً .. وتسميعها قبل وبعد الفطور .. لزوم الدبج والدحج والمتاغر
نبدا على بركة الله
إذا أقبل عليتس المتهور ناوي الاعتداء .. خليتس واثقه واركدي .. موب تقلبينها مناحه .. ويا ربيه وش أسوي .. وإلحئووووني !!
1- قولي كان في أمك خير تعال وجرب .. عشان يدري إنتس ما خفتي منه وقلبتس جامد .. عادي حتى لو قلبتس فضيخ وإلا نويعمه تخافين من الضواطير والصراصير (كرمتوا) والضبان .. مثلي عليه إنتس ما حسبتي له حساب
2- وعندما يصل محاولا تحويطتس بيديه .. افهدزي دمجتس بشكل سريع متخذتن وضع الجلوس قليلاً .. تسن ودتس تقعدين وهونتي
مع تجهيز اليدين في وضع التلكيم عشان تبقسين خشة اللي جابوه لو جا لتس فرصه
3- بعدها انكمشي برقبتس ثمن امغطيها بسرعه وفكيها خلي دمجتس تنطلدز إلى الأعلى .. وإنطحيه على صدره وخلي النطحه قويه .. يعني تسنها نطحة تيس عازلينه أسبوع عن باقي العنزات <<يا ربييييه
>> قصدي المعزا .. وحط حرته في الجدار ينطح فيه
المهم حاولي تفتحين في صدره دريشه وإلا مكان للمكيف
وطبعا الأثر الذي سيقع على المعتدي .. يتوقف على حجم دمجتس
.. فكان جبهتس عريضه تسنها لوحة مقهى فالأكيد إنها بتتفقع ديوده كانه مسوي فيها عضلات ويلعب حديد
أما إن تسان جبهتس صغيره وملمومه مثل جبهة مرة بباي
.. فالأكيد إنتس بتكسرين ضلوعه من النص .. بس انتبهي لازم تسحبين دمجتس للخلف بسرعه عشان ما تنشب في صدره .. خبرتس جبهه عرضها اربعة اصابع بتردع في صدر عرضه متر
أهم شي حاولي ما تعمين الدعوى .. وتدوخين من النطحه .. همن تصيرين من صيد أمس
4- بعد كذا .. عليتس بالمنطقه الخطره لأي شنب .. تحت الحزام
.. يعني اشقليه ركبه يحبها قلبتس .. عشان تسيطرين على الوضع مضبوط
عاد تسان ركبتس عصلا .. شرط بتطلع عيونه من الرجفه
وإن تسانتس مربربه شوي وركبتس فيها تغريزه .. فاحتمال تكون الخسائر لديه أقل من المتوقع .. لكن بتسبب مشكله له أكيد
5- وعلى طول وهو لاهي في نتايج الركبه تحت الحزام .. زي ما هو واضح في الصوره وينه حاط يديه على باله بيطيب بسرعه .. ارزعيه بكوتس على ظهره .. وخلي الدحجه قويه
موب تصيرين ناعمه فيها تسنتس متكيه على كنب .. لا .. تخيلي انه مطلوب منتس تسوين حفره في ظهر المعتدي
طبعا هالحركه تتوقف على رشاقتس وخفة الحركه وردة الفعل لديتس .. يعني تسانتس تخضخصين ويالله تديورين تسنتس تريله
.. عز الله بتقعدين تفحين ما سويتي الحركه .. تبطين عظم تسوينها إلا لين تخففين
6- ولا تعطينه فرصه يفكر .. مباشره بعد دحجة الكوع .. تعنقطي في دمجته وفريها نحوتس .. يعني جهتس .. صوبتس .. أي شي .. أدري بعضكن متنحات تحسبنا في مدرسة على بالها القواعد
ومن يوم تفرينها يمتس .. ارفعيه بركبه ثانيه على خشته .. لين تسمعين طقطقة ضروسه تسنها فناجيل قهوه مقرشع فيها بزر .. وخشمه يضرب بوري من قوة الترفيعه
7- في هذه اللحظه يكون الوضع مهيأ لتس .. إنتس تمارسين لعبة كرة القدم حتى لو إنتس كديش في الكوره
يعني تقدرين تركلينهو .. يعني تشوتينهو على كيفتس .. حتى تطرحينه أرضاً .. وهو غافلن مما جاه من تكفيخ ومردغه .. وباحلن بعمرهو
8- بعدها أشبعيه ركلاً وترفيساً .. يعني توطي ببطنه وحوسي مريره لين يعرف إن بنات الناس موب لعب
.. وإنتس شقرديه
<< هين بتوهقم بذا التوجيهات
في ذا الحاله عاد .. يمديتس تفضفضين .. وترجعين لطبيعتس وتقعدين تصايحين وانتي ترجفين فيه
حسبي الله عليك ياللي ما تخاف الله
.. وش سويت لك هااااه؟
.. عساك الضارب .. ومن هالكلام اللي متعودين عليه
أتمنى .. تكون ذا الحركات فادت بعضكن وعطتها فكره عن الدفاع عن
النفس .. لكن ما يمديتس تطبقين تسذا .. دامتس تدبجين في الرز كل يوم .. وتاكلين نص الطبخات اللي تسوينها في المطبخ والعذر انتس تذوقين
ملاحظه /
قلنا ما ودنا نتسثر عليكم .. ونحط قاموس للكلمات ملحق بالموضوع .. فاللي تصعب عليه أي كلمه يسأل عنها في رده عشان نشرحها .. وإلا يفهم من سياق الجمله << وين تدرسهم قلينزي انت؟!
ان شا الله انبسطتوا من الموضوع .. واللي ما هضمه .. يروح يشرب بيره والا سفن
دمتم بود