صرااااحه .. لا هذا ولا ذاك .. ثنينهم يجيبون العيد

يعني .. ذا العيون اللي تلاقط وتصيد خلق الله إذا زينوها بكحل ومحددات وظل وحركات ما لأمينها داعي علشان يفتنون خلق الله .. مو بتجيب العيد في الضعوف؟ .. هذا إذا هي لابسه برقع

وإذا لثمه .. أردى وأردى .. يعني بتطلع الجبهه .. عاد تختلف الجباه .. بعضهم زينه وتلمع كنها مقدمة بانوراما .. وبعضهم جبهتها كلها فلقات وصعارير وصايره كنها صدام ليموزين <<متعفطه
وبعد بتطلع الوجنتين .. يعني على بلاطه .. ما غطت إلا خشتها .. بس علشان ما نشوف أسنانها اللي كنها مفتاح ببسي .. وإلا السعابيل تخرخر <<هين انت جاي للموضوع بالغلط

فدرأً للمفاسد .. والفتنه .. وتضييع خلق الله .. كل الثنين ما لهم داعي

أزين شي الوحده تلفلف بذا الغطوه .. لين الله يرزقها بتمساحن يعرس عليها .. وحظه نصيبه وش يطلع له .. ساعتها تتميلح وتلمع كشرتها على كيفها .. له طبعا


الخلاصه <<بيقلب فصيح>> أن أول الفتنة في المرأة مرتبط دائماً بالعينين .. فهي السهام القاتلة حين تصيب ضحيتها .. ولا فرق إن كانت خلف برقع أم لثمه .. ففعلها وتأثيرها يبقى كما هو .. وقد قال أحد الشعراء في وصف النساء وعيونهن وتأثيرها بهذه الأبيات :

فوق العيون حواجب زج
تحت الحواجب أعين دُعج

ينظرن من خلل النقاب ومن
تحت النقاب ضواحك فلج

وإذا نظرن رمقن عن مُقلٍ
تسبي العيون فحشوها غنج

وإذا ضحكن ضحكن عن بردٍ
عذب الرضاب كأنه ثلج


قمر الخليج

يعافيك ربي على الموضوع الجميل .. ودايم خليك كذا .. اختاري أشياء حلوه

تقبلي مروري اللي زي قلته <<دامك فاهمها ليش جاي

والمعذره على الإطاله .. لأني حبيت المشاركه تكون كذا .. فيها نوع من الهزل ويبقى معناها موجود

يسعدك ربي ويوفقك في الدارين

دمتي بود وألف خير