لا هنتي أختي قموووره على الموضوع الروعه والرساله بتنبيهي لتوهيقة أخوي أبو دحيّم لي

وإنت يابو دحيّم .. وش ذا؟ .. كل روحاتك للصين !!

شكلك فاتح محل أبوريالين وتروح تجيب مقاضي من هناك .. بالله نبي منك درزن شروخ .. وتفافيخ (بلّونات) وبأقولك ليش ..
يقولون المنتدى نايم ذا الايام وفيه هدوء اوب زي أول .. عشان تسذا بنعبي التفافيخ مويه ونرجمهن على اللي نايمين خخخخخخخخ واللي ما يصحى بنولع بجنبـهـ/ا تسّمن شرخ << وين في رمضان؟

واذا انت موب فاتح ابوريالين .. فأكيد انك معرسن على صينيه << صينيه والا طوفريه كح كح << مشكله يطلعون عيالهم فناجيل وبيالات

معليش تسني شطحت شوي .. كله من أبو دحيّم الله يهديه .. دايم يرجعني للتنسيم مع إني معتزل

نرجع لمحور حديثنا .. اللي هو الوجوجه .. قصدي السفر


أول سفرة لكـ كانت متى؟ .... إلى؟

أول سفرة كانت في مطعم بخاري خخخخخخخ << يحسبها سفرة أكل

قصدي أول روحه خارجيه طبعا .. لأن داخليا من كثر ما سافرت ضيعت .. ومبطي تسني أكد تكسي من كثر ما أحومي .. لكن الحين ركدت << اي طيب

طبعا أول روحه خارجيه كانت ابتعاث للدراسه في إنجلترا .. يعني قلينزي .. ومنذو مده موب قايل متى << بدينا في النذاله


أطول سفرة كانت لمدة ....؟

أطول سفرة على حسب عدد الصحون والذبايح .. أمزح <<محد طلب منك

كانت لنفس الدوله .. بس كنت جاي في إجازه قصيره وتأخرت هنا يومين عن موعد عودتي فراح عليّ الحجز
ووقتها ما لقيت حجوزات من الرياض إلى لندن على أي خطوط .. وما كان فيه حل إلا إني أطلع عن طريق البحرين .. فطلعت للخبر بالطياره .. ووداني قريب لي كان يشتغل في الشرقيه وقتها على سيارته للبحرين .. وانتظرت في مطارها حوالي ساعتين إلى ثلاث ساعات وكانت الرحله غير مباشره .. فوقفت في أبوظبي تاخذ ركاب ونفسها ساعتين أو أكثر على ما أقلعت مره ثانيه .. ووقفت في باريس لنفس الغرض وأقلعت بعد ساعات ووصلت لندن بعد رحله يمكن أكثر من نص يوم
والرحله عادة من هنا لهناك .. ما تتعدى ست ساعات

بعدها حرمت أطلع الا في رحله مباشره موب ترانزيت .. لو أنثبر محلي << محلي وإلا سفري كح كح << لازال متأثر بسفرة الأكل


أحلى بلد زرته؟ ... ما الذي شدك إليه؟

اسبانيا .. وبالتحديد جزر الكناري .. روووووعه بمعنى الكلمه
ويمكن اللي شدني لها إن أجواءها شبيهه نوعا ما بأجواءنا <<أمحق مقارنه>> .. يعني تختلف عن أوروبا البارده والمظلمه من قل ما تطلع الشمس .. بكونها مشمسه وجوها حلو
إضافه إلى أن أهلها حارين شوي مثلنا .. عشان فيهم دم عربي وناسن حرتسين مثلنا ومرحبانيين عكس باقي أهل اوروبا الكئيبين


لو شاءت الظروف (عمل ... زواج ... مثلا) أي بلد غير بلدكـ كنت تتمنى تعيش فيه؟

أنا طبعا ما أتمنى أعيش فتره طويله برا بلدي الله يحرسها .. خصوصا بعد ما جربت الغربه والسفر لأكثر من بلد وشفت الفرق
لكن إن كان ولا بد .. فأختار اسبانيا .. لأني حبيتها صراحه وارتحت لأهلها


أكلة تحب اذا زرت دولهـ تذوقها ....؟

الكبسه طبعا
موب تريقه .. بس من الإدمان لازم آكلها .. وإذا ما لقيت أحد يسويها .. على الأقل شي يشبهها .. يعني أي شي فيه رز << لا يهمكم قاعد يدور فول قلابه

غير كذا البيتز .. واذا رحت مصر .. الكوشري طبعا << بالله وش تحس به على تشابه ذا الوجبتين؟


طرفة صارت لك في احد أسفارك و لازلت تذكرها؟

هي طرفه وحده بس .. الله من طرفات .. بس بأجيب منهن ثنتين

الأوله .. قبل أطلع لإسبانيا .. كان عندنا أسبوع راحه وقتها مدري كان لمناسبه زي عيد الفصح <<من ذا؟ >> أو شي زي كذا
المهم .. اتصلت على السفاره الاسبانيه في لندن .. وقلت لهم أنا سعودي وبأطلع إجازه من لندن لديرتكم .. هل أحتاج تأشيرة دخول؟ <<أول مره يصير نظامي << غصب
لأن الاوروبيين ما عندهم مشكله يتنقلون بين دول اوروبا بدون جواز

قالي موظف السفاره الاسبانيه .. بالقلينزي طبعا .. لا ما تحتاج تاخذ تأشيره من سفارتنا هنا .. إذا وصلت في المطار يعطونك تأشيره سياحيه مدتها شهر
قلت حلو .. مشكور يالطيب .. وكل حتسينا قلينزي اوف كورس

المهم يوم نزلنا وجينا كاونتر الجوازات .. طحت لي في موظف جوازات اسباني شايب عليه شنب يوقف عليه الثور <<عشان في اسبانيا>> وهو ما يعرف قلينزي وأنا ما أدير اللغه الأسبانيه
من اللخمه بغيت أقوله صديق خخخخخخخ
وقعدنا نتفاهم بالإشارات .. وما فهمنا بعض طبعا .. المهم وأنلطع شوي لين جا واحدن أرفع منه في الوظيفه .. ويطقطق قلينزي وعرفنا نتفاهم وقلت له عن كلام موظف السفاره .. وأشوى في الأخير صمخ الجواز بختم فيه تأشيره دخول لمدة شهر
وكل ما تذكرت حركاتنا أنا وياه وخويي ضحكنا من التنسيم في حركات الشرح

الموقف الثاني .. في مصر .. مره كنت أبغى بواب العماره أبوفتحي الله يذكره بالخير ياخذ ملابسي للغسال .. ما بقى معي غيارات
وكنت أقوله ومعي السواق خذ الملابس يابو فتحي وودهن للغسال .. مستعجل تكفى .. ترى محاتسيك محتاجهن اليوم .. لا تتأخر
قال ازهله .. بالصعيدي طبعا .. وأثاري السواق النذل غمز له عينه ولمحته .. بس فهمتها قلت يمكن يلمح له عن بخشيش والا شي

المهم بعد كم ساعه .. أناديه وأسأله وين الملابس .. ويقول .. دلوكيت حاروح أديبهم يعني أجيبهم
شوي .. وينهن يابو فتحي .. وكل مره يطلع لي بعذر .. يا مرسلني صاحب الشقه الفلانيه .. يا رحت أجيب شي لفلان .. وأنواع التصريفات
قفلت معي مره .. ونزلت له بأتفاهم معه .. هو له غرفه بجنب المصعد .. وأطق باب الغرفه وأدرعم عليه وأدخل قبل يجاوب .. لأن الباب مفتوح

وأطالع إلا ملابسي .. معلقه في الغرفه على حبل خخخخخخخخ
يلعن ابليسه .. وش ذا يابوفتحي يامال الضارب .. ما قلت لك توديها للمغسله .. صكني بنصبه .. قال كانوا مسكرين فما حبيتش اتأخر على حضرتك
قلت حضرتي .. زعلان أوي ومش حأكلمكش ولا أدلعكش بالبخاشيشكش << خارجوا أنفسكم

وأطالع في ملابسي الداخليه .. اللي عطيته ولونها أبيض .. إلا صايره تسنها القطب الشمالي لين بدا يميع الثلج خخخخخخخخ
يعني منيله بستين نيله .. نيلن صدز .. ومبقعه دواير زرق .. ناقصها بس يمشي عليها بطاريق وتصير نفس القطب الشمالي

وألمسهن لين توها رطبه ما نشفت .. نعنبو بليسه ناشرهن في الغرفه ويبغاها تنشف

أثر السواق النصاب مأشر له يغسلهن عنده عشان ياخذ حق المغسله .. قلت خذها الله لا يهينك ورح ودهن للمغسله وعلى حسابك يا جنط << وش عرفه جنط؟
في الأخير سامحته طبعا .. لأني فهمت السبب اللي خلاه يسوي كذا .. وموب قايلكم .. سر


أجمل تذكار محتفظ فيه من اي دولهـ ...؟

التذاكير <<لا تخترع كلمات>> واجد .. وكان معي كميره توني شاريها وقتها وما أقابل عاير وإلا خشة أحد إلا أصوره وأتصور معه خخخخخخ لين صرت استديو متنقل .. صايرن ياباني على غفله وأنا مدري

فيه أكثر من تذكار طبعا .. وبعضها هدايا من أشخاص من نفس البلدان
لكن أكثر شي أحب استرجع الذكريات فيه وأتفرج فيها هي صور مضحكه لي وبعض الزملاء في متحف الشمع الشهير مدام توسو (Madame Tussauds) اللي مثل ما يعرف أغلبنا يضم مجسمات للمشاهير من الملوك والقادة والممثلين وغيرهم .. وهذي صوره للمتحف من الخارج ونماذج من المتحف





هذا الملاكم الأمريكي المسلم الشهير محمد علي كلاي



وهذا طبعا الزعيم الهندي غاندي .. سامع يا فاقدوووه .. خوفي تشوفه وعلى بالك حارس استراحه والا تبغاه يغسل الجمس حقك

تراه تاريخ هاللي تشوف عصاقيله .. وش عرفك في السياسه انت !!

كنا نصور بجنب بعض الشخصيات أو المجسمات ونسوي حركات زي ما نكون نسولف معهم مثلا وطالعه أشكالنا موب بعيدتن عنهم


نبي صورهـ لدولهـ تتمنى زيارتها...؟

يعني لازم الإحراج

هذي صور .. الظاهر والله العالم إنها لجزيرة كابري في تايلند .. المهم اذا موب صح لحد يسألني وينها فيه بالضبط .. بس ودي أروح لها .. شوفوا الروعه والهدوء















اجمل مكان شفتهـ بسفركـ ...؟

في وحده من الرحلات <<ضيّع ما يدري وهو رايح والا جاي>> .. مر بنا الطيّار الله يهديه من فوق جبال الألب .. وآاااه يا ألبي .. على المنظر وجماله .. روعه سبحان الخالق .. وقمم الجبال يزينها بياض الثلوج .. صايره تسنها عسكريم من بعيد


كم مرهـ سافرت بحياتكـ ...؟

ما عديت بصراحه .. وأنا وش عرفني بتجيبون موضوع زي تسذا وتسألوني


دولهـ عجبكـ التسوق فيها ...؟

إنجلترا .. يمكن عشان كنت هناك فتره فأتقضى كثير .. بس بدون مكاسر طبعا << ما يمديك والله لو إنك في المعيقليه


آخر بلد زرتهـ ...؟

أم الدنيا الله ياخذ العدو .. ويرج أبوفتحي


شيء لا تستغني عنه في سفرك طبعا بعد القران الكريم ...؟

طبعا غير عنوان وأرقام السفاره السعوديه في الديره اللي باروح لها .. لازم آخذ أرقام ناس أعرفهم .. أو ناس يعرفون ناس أعرفهم
أهم شي أي أحد وقت الزنقه .. لو يضيع الواحد والا ينسرق .. سبحان الله .. ساعتها دور أحد يخليك تغسل صحون لين ترجع


أجمل مطار شفتهـ ..؟

أنا ما أركز في المطارات من زود العجله أول ما أدخل صالة المغادرة وأعرف بوابة الصعود .. أدرعم على طول هناك وأقعد أقز في الطيارات وأقول أي وحده بتشيلنا
لكن في رايي كتنظيم .. مطار هيثرو .. وكمساحه وهندسه معماريه مطار الملك خالد الدولي بالرياض << لازم يخاوز ويمدح ديرته


كلمة { أو نصيحة } أخيرة للمسافرين وقسم اللسياحهـ والسفر؟

أول شي اللي يسافرون دول أوروبيه .. احذروا من العرب أكثر من الأجانب .. خصوصا اللي يشتغلون هناك مترجمين والا سواقين والا مرشدين سياحيين .. والله إنهم غشونا أكثر من الغرب أنفسهم
كان الواحد منا إذا شاف له عربي تسنه طايحن عليه من السما .. واخرتها أول من يتمنذل فيك هم
طبعا ما أقصد عيال ديرتك يالواحد .. فهم معك بنفس المركب ويحرصون عليك زي أخوانك .. الا القليل جدا
والأهم الابتعاد عن أماكن الشبهات .. اللي تجر الواحد لأشياء لا تحمد عقباها

بالنسبه للقسم .. ما قصروا الجميع .. الكل يحاول يجي بشي جديد ومختلف .. وعساكم على القوه كلكم .. ومنها لأحسن بجهود مشرفي القسم والأعضاء ومتابعة الإدارة


شكرا .. قموره .. شكرا .. خيالك

أتمنى إني كنت ضيف خفيف على قلوبكم .. وما أزعجت البعض بذا المشوار .. واللي بيخاويني المره الجايه الله يحييه .. بس لازم قطه ويكون يدل



طبعا .. أوهق بعدي .. بنتي آخر العنقود .. ريحة الورد .. فلتدرعم هنا مشكوره



يسعدكم ربي ويوفقكم



دمتم بود وألف خير