طبعا المسأله موب احتجاج على عادات معينه ولا شي << أصلا لو تحتج للصبح محد جاب خبرك


تعريف من بدري .. الخشه = مقدمة الوجه وغالباً البراطم (وهي ما يعرف بالشفايف بالنسبه للياااي) والخشم طبعا الكل عارفه << لا يا شيخ



نجي لموضوعنا

تعرفون أنواع السلام عندنا .. منها :

المطخ (البوس) على الخدود .. ومنها حبة الراس <<ميب العلاج >> اللي هي طبعا مخصصه للوالدين وكبار السن .. والسلام العادي اللي هو المخامس
اللي ما يعرفون المخامس .. يعني المصافحه .. وإذا أحد قالك خمسك خمسك .. موب تطلع من مخباتك خمسه ريال وتعطيه على بالك يطر (يشحذ) .. ترى قصده قيف مي فايف << أبوتس ياللغه شو بتعئد <<منتب عاقل يا سعد قونزاليس

ومصطلح ثاني .. بيقولك مدها .. موب تنسى نفسك وتحسبك أيام الدراسه يوم يلزخونك المدير والمدرسين بالخيزرانه وتقوم تفتح يدك خخخخخخخخ
لا ترى قصده سلم .. عاد انت سو نفسك ما دريت وبوسه خخخخخ .. لا قصدي سو نفسك فاهم وقل شدها .. ترى المقصود لازالت يدك طبعا .. موب عنز منحاشه

أعرف واحد دبوج ناعم .. جاه واحد تمساح حرش (خشن) وقاله .. مد أم الشحم
قال الناعم .. لييييييييه شايفني بنشري خخخخخخخخخ .. يحسبه شحم سيارات ما يعرف وش الشحم الصدز
ما درى إنه هو الشحيمه حده بس يتخضخض تسنه غسالة هدوم من كثر ما يدبج في الهمبرقل والشاورمع <<ينشب عند المطاعم ما يعرف وش يطلب عشان المسميات


المهم نجي لأسوأ .. سلام في نظري .. مع إنه يعتبر تقليعة العصر <<العصر وإلا الظهر كح كح <<موب وقتك لا تسمج واخلص كمل>> وصار ينتشر بسرعه .. حتى اللي ما يعرفونه صاروا يقلدون خخخخخخخ

ألا هو .. السلام بالخشوم

أنا اعتراضي موب على السلام نفسه .. بس الطريقه .. يعني لازم أحط خشتي في خشة واحد ثاني

طيب افرضوا معجون الأسنان حقه مخلص <<وليش ما يكون معجونك انت اللي منتهي مثلك>> .. وإلا ما يعرف أم الفرشه أصلا .. وإذا سوى نظيف ذاك اليوم حده مسواك شاريه من بنقالي منقعه أسبوع في مويه وأسبوع في ثلاجه وحاط عليه فلفل عشان يقولون حار

يعني عندي اختيارين .. يا أسلم وأنا كاتمن نفسي .. والله لو إني غواص .. وإلا بأطب محيفره <<حركه سباحين ما تعرفونها الله من سطعة البطن على المويه أححححح>> في برتسه (مسبح قديم)

وإلا أتحمل ما يجيني من ذا الخشه اللي بيصير بيني وبينها إلتماس <<وين كهرب>> وحظي نصيبي

يا تغر (تجشأ بكل قواية وجه) وأنا مقربن وجهي وهذي تصير دايم إذا جيت في عزيمه وإلا عرس وما شفت أحد إلا بعد الأكل وتشوفه ينقش سنونه .. تقوم تجي ترز خشتك يقالك من زود الغلا رايحن تلاحقه تسلم عليه وهو ما بعد هضم خخخخخخخخ

وإن تسانه متعطر بطيب يبغثر التسبد .. خصوصا الماركه اللي ما توجد إلا عندنا .. " شذا الصنان " (رائحه يفرزها أردى إبط في العالم) .. الله يعينك .. لا يمديك تتلطم ولا توخر خشتك


أنا أتذكر واحد الله يستر عليه .. أتفادى أسلم عليه .. لأنه يمووووووت في شي اسمه كراث وبصل أخضر .. ودايم يرعى مع أهله في ذا النوعيه من الخضره
صارت هالحاجتين أساسيه عنده في أي مقاضي يجيبها .. لو يرسلونه أهله يجيب نواشف جاب معه كراث وبصل أخضر .. يتصلون عليه يا فلان جب لنا تسذا وتسذا من أبو ريالين مر محل الخضار وجاب كراث وبصل أخضر .. يعطونه ورقة مقاضي مكتوب فيها أشياء ما معها كراث وبصل أخضر يقوم المدمن ابن المدمن ويجيب كراث وبصل أخضر

تصدقون .. يوم جا اليوم الوطني .. استخدموه " علم " خخخخخخ عشان لونه صار أخضر من إدمان الكراث والبصل << أرنب يمشي مليون>> بس ما كتبوا عليه الشهادتين .. لأنه دايم يتمردغ على رصيف بيتهم من الفضاوه ويقلب ثوبه بني .. وريحته أصلا بصل الله يكرم الشهادتين عنه


المشكله بعد إذا صارت خشومكم .. انت وذا اللي بتسلم عليه .. موب قريبه من بعض من حيث المقاسات خخخخخخخ

يعني تسان خشمك وش حليله ومزينن خشتك .. وجيت تسلم على واحد خشمه تسنه نقار خشب من طوله .. فك عمرك قبل ما يصير في راس خشمك نفطه من صدمة خشمه

وان تسان خشمه هو منفرش شوي وإلا أفطس .. وخشيمك أطول من خشمه .. الله يعينك على ردعة خششكم في بعض .. يعني توقع تبنيطة براطمكم في بعض تسنها كفرات ضاربتن في طرف رصيف خخخخخخخ

لا عاد مع الريحه بعد .. بتحس إنك واقف في شارع تفحيط موب سلام << بتشم ريحة كفرات

وفيه ناس ما شا الله عليهم .. براطمهم تيوبلس .. وبعضهم طبقتين تسنها حافة مسبح من ذا اللي يتفخونهن بهواء <<بالله عليك أجل وش يتفخونها مويه لا سمح الله أكيد هواء الله من زود الذهانه فيك بس <<موب تسني هزأتني
يعني لو يبنط في جدار بينت رسمة البراطم في الجدار ولا صار لخشته شي


بعدين تخيلوا .. الجنس الثانين اللي هم الحريّم <<أقدع ناس وأطلق خشش مفهيه>> يطبقون نفس السلام خخخخخخخخ .. أنواع الحوادث

خصوصا اللي مركبه في خشمها .. زمام (مسمار كمار يثبت في الخشم على بالها بتصير ممثله هنديه إذا حطته) .. ويكون كبير مغطي نص خشمها .. تسنه دش قنوات المجد

هذي لو تسلم على وحده ثانيه حكت خشتها .. وبتدعي عليها الثانيه طبعا هي وسلامها الله لا يعيدها وياه

لا وتسلم .. وهي تدق الديرم .. تسنها تلون لوحه .. وتصرقع بالصعرور على بالها دلع .. وأنواع طرطشة السعابيل خلق الله .. تسنها ليّ موية حديقه فيه تنسيم بالنص <<شكل التنسيم ما تعداك انت

وذا الزمام كل شوي ناشبن له في شي .. يتبع لحرمتن ثانيه .. يا ناشبن في شيله (مسفع <<يقالك شرحتها الحين)

يا ناشبن في كشة ( وهي الشعر المحيوس والشيفه ويطلق عليها أيضا العراده) وحدتن مخسرتن رجلها بتضييع دراهمه عند كوافيره وكدوا كشتها لين داخت وأحرقوا أم الاستشوارات وما صلبت ولا طرى على أبو عرادتها تتخلى عن التشصيبه وتنعم شوي

وإلا تعلق ذا الزمام في خمخمة وحدتن اخرى <<وين ميداليه>> يالله وراح وقت العزيمه والا العرس والمعازيم في إنقاذ خشم راعية الزمام


المهم أنا قررت <<موب على كيفك>> إني أرفع شعار .. لا لخشمك خشمك .. وأول ما يقابلني واحد وأحس إنه ناوي يصمخني بسلام فيه تطبيق حركه .. أقوم ألف خشتي عنه وأعطيه صدغي (أحد الخدين) عشان نسلم زي كل أبو دايم .. موب خشم

صح بعضهم .. مسوي فيها .. موضه ومخلي شعر دقنه تسمن يوم ما حلقه على باله مسوي .. ديرتي .. وهو صايرن وجهه شوك تسنه قنفذ .. إذا سلمت عليه طعز وجهك ومشخه بشعره

لكن ما يخالف .. عندي أهون من الخشه وتوابعها


يالله تعبت وأنا أحتج .. سي يا بعدين


أي مصطلح موب واضح .. انتظروا قاموسي للكلمات قريباً سيتم توزيعه في الأماكن




رؤيتي وبقلمي .. للأماكن فقط

ولا حلل الله اللاطش والمقلّد