|
|
|
ياذا الفايرفكس .. ليتني مانزّلته!!
سلام عليكم انا عندي مشكله .. واحمّلكم انتم المسؤليه .. في الحقيقه انا ماكان ودي انّزل ذا الفايرفكس لأني احب قوقل كروم وش نسوي عاد صار اللي صار ونزّلته ! وبعدين شفت الاعضاء يمدحونه والعيّار يقول ازين شي للأماكن فايرفكس قلت يلا ننزّله وش ورانا ! المشكة ان اول ماحملته قامت تصير اشياء غريبه في جهازي ! اعطيكم مثال كلما جيت اتصفح في الأماكن يطلعلي مدري وشو ويقول نبي ننزّل لك أغنية مدري وشو وماينتظرني اعطيه الموافقه لا يوافق من نفسه ويبدا تحميل .. ولا كأني وليّة امره !! وبعد مايخلص شغله يقول خلاص تم .. اسأله طيب علمني وش السالفه يقول موشغلك ! ويطلعلي شي زي كذا http://www.al-amakn.net/vb/uploaded/...1300367344.png وبعدين فجأه من زاوية الشاشه يطلعلي شي صغير يقول كذا ! http://www.al-amakn.net/vb/uploaded/...1300367344.png المشكله يوم اني ابي اشوف وش ذي الاغاني اللي مزعجنا فيها وينزّلها من الصبح يطلعلي هذا ! http://www.al-amakn.net/vb/uploaded/...1300367344.png يعني مايكفي انه غاثنا بهالتنزيلات .. آخرتها مايشتغلون ! صدق لاقالوا شين وقوي عين ! مره من المرات .. كنت اتصفح وهو كالعاده شغّال تنزيل ! بس هالمرّه ماقَِدر يكمل لان الدسك ماعاد فيه مساحه من فعايله الله ياخذه ! وجا يقول ترى مافيه مكان .. مااقدر اكمل شغلي! طيب وانا وش اسويلك !!! :mad: من اول اقولك لاتنزل وانت معطيني طاف .. ماغير تعبّي في هالدسك! هذا شي .. الشي الثاني صفحة اليوتيوب ماتطلع ليه .. يعني مثلا ً يوم دخلت موضوع العذوب الي في قسم اليوتيوب يطلعلي كذا .. http://www.al-amakn.net/vb/uploaded/...1300367575.png الأعضاء يشوفون المقطع ويضحكون .. وانا مو داريه شسالفه ! ويوم اني انقر هناك مثل مايطلب .. يقوم ينزّل برنامج عبودي ( Abode ) اقول له .. طيب انا عندي ذا البرنامج من اول في جهازي .. وهو يسوي نفسه مايسمع ويكمل تثبيت البرنامج اقول له طيب اسمعني شوي:( مافيه .. شغّال الأخ! وبعدين يجي يقول بكل براءه ترى عيّا يكمل تثبيت لان مافيه مساحه في جهازك ! مو انت اللي عبيته بأغانيك :mad: الشي الثالث .. صار لي يومين وانا ادوّر الفيفوريت (المفضله) حقت الفايرفكس وييييينه فيييييه !!! قسم يجيب الأعصااب ذا المتصفح !!! آخر شي زهقت من هالمتصفح .. وقلت خلني امسحه بس وارتاح وش اللي حادني .. يازين كروم! رحت على الكنترول وجيت ابمسح فايرفكس مايخليني :confused: تطلعلي نافذه تقول هوا دخول الحمام زي خروجه !! لحوول وش ذي اللبلشه ! عندكم فكره عن الموضوع ياجماعه ؟؟ جاب لي السخونه قسم :( |
رد: ياذا الفايرفكس .. ليتني مانزّلته!!
أهلا بك أختي مبسوطة
بصراحة أنا ما بافهم بهذه الأشياء بس أكيد راح تلاقي مساعدة من قبل الاخوة أتمنى أن تتنهي مشكلتك و تجدي حل لها تقبلي مروري جووود |
رد: ياذا الفايرفكس .. ليتني مانزّلته!!
السلام عليكم
انا عندي متصفح الفايرفكس ومن اروع مايكون بصراحه واما الاشياء الغريبه الي تطلع لك عمرها ماصارت معي انا اتصفح فيه كل شي مو بس الأماكن لدرجة اني سحبت ع الانترنت اكسبلورر واما بالنسبه للي تظهر فالزاويه عادي تصير لمن تحملين اي شي اما باقي الامور ماصارت معي ولو اجلس اذكر مميزات الفايرفوكس اللي اكتشفتها مع الوقت والاستخدام امكن انسى من كثرها واذا ماجاز لك اختي عادي طيريه وخليك على المتصفح حقك وبث خلاث هههههههههههههه حبيت ادافع عن حقي مقي |
رد: ياذا الفايرفكس .. ليتني مانزّلته!!
يعطيك العافيه جود
تكفي اطلالتك الحلوه مشاكلي كلها تنحل ! |
رد: ياذا الفايرفكس .. ليتني مانزّلته!!
عاشقة الفايرفكس
اجل تتوقعين انه على ناس وناس ؟! هو عاجبني بس لو يبطّل استهبال يصير كل شي تمام ! وبعدين انا كنت بطيره من يقول اني ميته عليه !! بس المشكله ماهو راضي ينمسح مدري وش سالفته ناشبلي ودي احذفه واحمله مره ثانيه يمكن يعقل ! عموما ً يعطيك العافيه .. وشهادتك مقبوله بس ورى ماتعلميني وين محطوطه المفضله حقتكم ؟!! |
رد: ياذا الفايرفكس .. ليتني مانزّلته!!
صراحة اللي اشوفه اتوقع انه فايرس في جهازك
او ان المتصفح لم يكتمل التحميل لكن انا نزلت موضوع جديد عن متصفح جديد هذا الرابط اضغطي هنــــــــــــــــــا لا فاير فوكس ولا كروم كل الود |
رد: ياذا الفايرفكس .. ليتني مانزّلته!!
غريبه بصرآحه
فايرفوكس مرآآآ روووعه .. عندي الله يعينك ومـآقصر معآك شمالي عطآك الرآبط .. |
رد: ياذا الفايرفكس .. ليتني مانزّلته!!
سلام عليكم
هاه بشري اختي مبسوطه حليتي المشكله ولا تو اذا ما ضبط الحل حق أخوي شمالي ان شاء الله اكون عرفت الحل تحياتي |
رد: ياذا الفايرفكس .. ليتني مانزّلته!!
اقتباس:
والله يابنت الناس ماعندي شي اضيفه على كلام الاخت الي فوق طيب هل نسخة الفايرفوكس متوافقه مع الويندوز الي عندتس ؟ يخليكم ربي :) |
رد: ياذا الفايرفكس .. ليتني مانزّلته!!
شمالي
لا ماظن فايرس جهازي وانا اعرفه كل يوم انظفه واسبحه! يعطيك العافيه والمتصفح الجديد ان شاءالله رح انزله بس بعد ماافقد الأمل من الفايرفكس ! مشكور اخوي |
رد: ياذا الفايرفكس .. ليتني مانزّلته!!
عذبه .. ايه زين عندكم ماقلنا شي
بس بلاه مو زين عندنا :(!! يعطيك العافيه |
رد: ياذا الفايرفكس .. ليتني مانزّلته!!
الولهان
والله ياخوي انا ماودّي انزّل شي جديد الحين لين ماامسح اللي قبله .. عشان لايثقل الجهاز ! لكن وش الحل اللي عندك؟ |
رد: ياذا الفايرفكس .. ليتني مانزّلته!!
العيار
ايه النسخه متوافقه مع وندوزي انا عندي xp وكل شي مضبوط واوكيه بس مشكلته مع كل صفحه ينشبلي بتنزيل بلير جديد عموما ً يعطيكم العافيه |
رد: ياذا الفايرفكس .. ليتني مانزّلته!!
وعليكم السلام ورحمة الله وبركاته .. انا استخدمه من سنين ومره مريحني وحلو لدرجة طلقت الانترنت اكسبلورر بالثلاث لأنه غثني وعل كبدي :D اما تنزيل الملفات لوحدها ماقد صارت معاي نهائي .. والمربع اللي يجي بالزوايه يصير عند الكل لمن ينتهي التحميل يعطيك خبر بس .. http://www.al-amakn.net/vb/uploaded/...1300367344.png إعدادات الأمان الحالية لا تسمح لهذا العمل شوفي برنامج الحمايه عندك :/ http://www.al-amakn.net/vb/uploaded/...1300367575.png البرنامج عند إما مو مثبت أو غير كامل التثبيت وهذا تصير معي إذا البرنامج مو مثبت على الجهاز لكن اثبته وغالبا يطلب تنزل برنامج Adobe Flash Player طبعا كل مره احمل الفيرفوكس يقول حدثي هالبرنامج لكن انا اطنش لانه عندي وشغال تمام الشي الثالث .. صار لي يومين وانا ادوّر الفيفوريت (المفضله) حقت الفايرفكس وييييينه فيييييه !!! قسم يجيب الأعصااب ذا المتصفح !!! مفضلة الفيرفوكس هي العلامات وإذا على البرنامج مو راضي ينحذف وتبين تحذفينه قولي لي وانا اعطيك برنامج يحذفه لك من جذوره :) بس بسألك وش نظام جهازك وكم إصدار الفيرفوكس اللي عندك ..؟ انا الاصدار الل استخدمه 3.6.15 وتمام مع اكس بي و7 |
رد: ياذا الفايرفكس .. ليتني مانزّلته!!
الله يعطيك العافيه يام عبدوو
ايه هذي الردود اللي تبرد القلب تحسسني انك مهتمه فيني شوي! اجل المفضله هي العلامات .. طيب هذي حليناها بقى عندي اللي يتنزّل من نفسه .. قلتي ماتعرفين له طيب الي بعدوه برنامج الفلاش مثبت زين عندي انا ثبتّه وسمّرته بيديني هذول ! يعني في كروم واكسبلور يشتغل اليوتيوب عادي والإصدار اتوقع اللي عندي اقدم من اللي عندك 2,0 مدري جبت لك صوره عشان تحللين في النسخه شكلك تحبيّن هالشغلات http://www.al-amakn.net/vb/uploaded/...1300514826.png هاه بشري ؟ عساه مب زين عشان امسحه ؟ وايه الله يعافيك عطيني هذا الشي اللي تقولين يشيله من جذوره عل وعسى يريحني منّه ! شكلي ابمسحه وانزل متصفح شمالي! متصفح العيار ماضبط عندي! مشكوره يالغاليه |
| الساعة الآن 10:50 AM. |
|
Powered by vBulletin® Version 3.8.4
Copyright ©2000 - 2024, Jelsoft Enterprises Ltd.