أكتب وأنا أدري فيك خايف ومذعور=من رد يصعب على شرواك تفسيره
تعال شوف اللي كتبته ومحظور=عن حبّنا
الضايع أبعلن مصيره
بعض البشر يعشق على غير دستور=جاهل ومايصمد على السّيل بيره
يسعى على نقل السوالف مع الزّور=وكذبه على حساب الحبايب خطيره
مدري هي إستفزاز ولاّ إنها جور=بس الوكاد إنه مهو سلم غيره
وقت الهداد إتهد عقبان وطيور=خل الحباري تنثبر ياملا الطّيره
منته بقد اللي تقوله ومخبور=صغار الأوادم ماتحرّك كبيره
حبّك بقلبي كان يبني له قصور=واليوم هدّيته بزلّه صغيره
أجيك ظامي وإنت تملك لك بحور=تبخل بعذبه وإنت تشكي غزيره
تسقيني المالح وأنا أقول مشكور=وغيري تمتّع في صفاه وغديره
كم مرّتن تخطي وأنا اقول معذور=توّك على الإحساس سنّك صغيره
واليوم يوم إن الليالي غدت نور=تفتّحت عيني وصارت بصيره
عفتك ومايحتاج أبديلك الشّور=الراي واحد مانويت إتغييره
ياكثرهم جوني ومافيهم إقصور=وخلّيتهم بأسلوب ياصعب تصويره
كلّه لجل عينك يبو قلب مكسور=مافاد فيك الطّيب حيره بحيره
لاصار طبعك شين ماني بمجبور=آرد بحورك والموارد كثيره