الموضوع
:
صفحتي .. ثرثرة وضحكة وهمسة !!
عرض مشاركة واحدة
01-02-2010, 10:43 PM
المشاركة
172
عضو له مكانه في قلوبنا
تاريخ الإنضمام :
Apr 2002
رقم العضوية :
127
المشاركات:
6,276
راعي النيميل من جديد .. !!
خل الزعل .. وإضحك .. وإقتل الهم الثقيل .. !!
بالضحكة المستمدة من مواقفنا ..
قد نعالج شيء من الألم .. ولو مؤقتاً !!
& ^ ^ ^ ^ &
من زمان ما جبت سوالف خوينا (راعي النيميل)
صاحبنا وش حليله هالأيام .. هو طبعا وش حليله من الأول بس الحين بزياده
طاح مؤخراً في التقنيه وعالم الكنبوتر .. زي ما يسميه
.. واشترى له جهاز .. لالتوب .. زي ما يسميه برضو خخخخخخخ
المهم .. بدينا نريّشه .. ونقول أحلى يا حركات .. صرت تسنك مدير وانت مشخص بشنطة ذا المحمول .. وانت داخل للدوام وطالع منه .. ما عاد تحاتسي أحد ولا شي .. عطنا وجه ياخوي !!
عاد هو من اللكاعه اللي فيه يقول : لو سمحتوا لحد يتكلم معي الا يكون شخص عميق في التنكلوجيا
حنا طرطعنا طبعا
وقلنا : انت الحين احتس زين بعدين فكر تصير مغرور .. عكست أبو الكلمات يالشين
وترى عميق تنقال عن البحر والا أي برتسة مويه بتطب فيها محيفره
.. موب على التكنولوجيا
عارفين قصدك شخص متعمق في التقنيه
.. لكن بنفس الوقت عارفين إنك من جنبها من قبل يصير عندك لابتوب بس عساه ينفعك .. وتطور نفسك وتعتزل الفهاوه خخخخخخخ
فقلنا لازم نردها له .. ونهبل به
بعد ما درينا إنه طاح في المسن .. وأزعجنا يقول اللي عنده (نيميل)
ويبغاني أضيفه يكتبه في ورقه ويعطينياه .. وخلوا خطكم واضح لو سمحتوا والا لن ينظر في الطلبات .. ولن يمتكن إضافتكم
هو قايل تسذا عشان ما يتوهق في السبيلينق والحروف .. كتابته أوردو
قلنا : إلا وش رايك يقدم كل واحد معروض على سعادتك عشان الإضافه؟ .. والله لو إنك بتوزع شرهات الحين
قال : والله ميب شينه .. عشان ما يصير فيه زحمه امسكوا سرا بعد !!
طنقرنا عليه زود
.. واتفقنا نوسوس به
قلت : شف يابو الشباب .. تراك تعز علينا .. قاطعني هو قال :
تعز وإلا صنعاء؟!
<< متعلم ذا الذبات منا
قلت المهم خل عنك ذا الحتسي ولا تمسك فيها خط .. ولا تقول رقعه وإلا نسخ الحين
.. همن أطبق على أصابعك بلابتوبك
حنا قصدنا عشان كذا بننصحك قبل تجيب العيد
انت ما زد سمعت بشي اسمه (هكر)؟!
قال : الا .. ذا المايعين اللي يشكشكون في حفلات الزواج؟!
كعيناها ضحكه كلنا
.. قلت : ياخي ما شا الله عليك .. كل مره تثبت لنا .. إنك من جنبها فعلا
نعنبو إبليسك .. المسن تسميه الشايب .. ماخذه من المسنين
ما تدري إنه اختصار ماسنجر .. والحين هكر فاهمهم ناس ثانين
لا ياخوي .. هكر .. يعني شخص عبقري .. متعدينا وياك بمسافات .. وصل فيه الذكاء الإلكتروني إنه يقدر يخترق أي جهاز يحطه في راسه
وانت وجهازك ما يحتاج أحد يحطكم في راسه .. لأنك مفتوحين على بعض .. تسنكم برحه
جهازك فيه كاميرا .. ولو دخلت مسن .. وانت مفصخ ماعليك الا فنيلة العلاقي ومطلع عضلاتك ذا اللي تسنها مطبات شوارع الرياض
<<اوب متناسقه>> ودخل عليك صدفه .. بيصورك وانت ما تدري
وينشر صورك بالنت كله وتنفضح
وتخيل بكره .. نلقى مقطع اسمه .. شاهدوا راعي النيميل يعرض المستخبي
ويوم سمعني أقول تسذا .. ركز معنا شوي وشكله خاف.. قال : طيب وش أسوي؟ .. وش الحل؟
قلت : سهل .. لا تستخدم الكام مع أي أحد .. وإلا تدري غطها بالمره وش تحتاجها فيه ومن حريص يحاتسيك مسن ويشوف خشتك؟!
.. حط عليها ستكر وإلا ان شا الله لزاق جروح
.. المهم شي يغطيها
قال : بس هذي؟! .. بسيطه .. أسهل ما يكون؟!
اللوح قام غطاها بـ
علك
.. لا ومطلعه من فمه
المشكله إنه كل ما انسجم في التصفح .. أخذ العلك ومضغه شوي .. ورجعه على الكام !!
يعني خلاه اثنين في واحد خخخخ .. مره للكام .. مره بفمه
خلاص عاد .. كل واحد منكم ينتبه لكامه
بس لا تفكرون بالعلك خخخخخخ
أما لو تفكرون فيه .. خصوصاً أخواتنا الفراشات .. بيحطون صعرور
وبتمشي بضاعة راعية البسطه
<< براااا
عادي لو ما ضحكتوا .. أصلاً أنا ضاحك قبلكم مباشر
™ تشاوو .. يرحمكم الله
رد مع الإقتباس