][ أتـهـمـت في مـدرسـتـي بـالـكـفـر...؟][
![أتـهـمـت مـدرسـتـي بـالـكـفـر...؟][](http://img105.herosh.com/2010/08/03/349999789.gif)
حبيت ابدأ لكم قصتي من خلال موقف صار لي بمدرستي أنا..
وتفاجئت في اللي صار وماصرت أنام من كثر حرتي
وصراحة صدمه لي..ابدأها لكم وبحاول اختصر لجل ماطول عليكم..
بسمه تعالى..
ثاني يوم دراسي كان من احد زميلاتي بالفصل تحتفل
بيوم ميلادها عادي البنات ملتمين حولها ويقدمون هدايا ويهنونها..
عاد كان معلمه الدين عندنا وواقفه عند الباب ومادري وين بالها فيه..
فجأة دخلت علينا وقالت شقاعدين تعملون عاد البنات قالوا نتحتفل بعيد
ميلاد ندى..قالت نعم عيد ميلاد...ماتعرفون ان اهوا حرام..
ماخلت شي إلا وقالته يالله كيف كان شكلها واهيا تهاوش...؟
عاد البنات ألسنتهم طويلة حرام لا عادي الكل يحتفل فيه..ووو...؟
أنا تفاجئت من هجومها وتميت ساكتة ابي اشوف لوين راح توصل..
واهيا تهاوش مادري علامها..
قالت تتشبهون بالكفار وتقلدونهم...
البنات يردون..لاعادي مانتشبه بأحد حنا نحتفل لانها كبرت وصار
عمرها 17 سنه وهالشي يسعدنا كأنه عيد وفرحته.....الخ..
ماقتنعت ابد وقالت..لا كأنه ولا شي كأنه هذي شيلوها..من بالكم..
وخليكم من الظلاله اللي انتوا فيه تبون تصيرون كفره قلدوا الكفار..
حسيت انها تجاوزت حدوها واسلوبها كان جدا سيئ وتعابير الوجه طبعا..
قمت من مكاني وقلت..
بعد اذنك استاذه..كنت حابه تحاولين تقنعين البنات بشكل افضل..
لان انتي تشدين واهما يشدون وبها السبب مافي احد منا راح يتقبل رأي الثاني..
ومعك حق بكلامك لكن بطريقتك كلهم بعاندون ويتمسخرون ..
وبخصوص قولك ..نشيل كأن من القائمه ولانقول إن في ايام كأنها عيد امبلا فيه وأنا
بقلك شنو اهيا...
قالت لاتفتين من عندك ولا تطاولين علي وتقولين شي ماتعرفينه..
رديت قلت ولله الحمد طول عمري محترمه وافرض احترامي علي حولي..
وأنا ماتطاولت عليك حبيت أوضح لك شي بسبب اتهامك اللي أتهمتيه لنا
واهوا الكفر ولظلاله..وهالكلام كبير توقعت كلمه وانقالت لكن اثنيتي عليها..
في 3 ايام عند المسلم وكأنها عيد..واهيا..
يوم..يتوب فيه العبد من ذنبه ويهجر معاصيه ويعود لرب العالمين..
ويوم..يلاقي فيه رب العباد على خاتمه حسنه وأعمال مبرورة..
ويوم..يقوم بجميع فرائضه في جماعه ويسلم نفسه من المعاصي...
عاد ردت علي واهيا تصارخ..
وقالت انتي شقاعده تقولين كلامك هذا من وين جايبته..
البنات يرودن علي يا......لاتتفلسفين طيب ...
تفاجئت وقلت عاد انتوا خليكم من النفاق وكونوا مع الحق مو قدامها تمدحون
وبعدين تنهشون فيها لاحول ولاقوه خليكم من النفاق..
ردت علي طالبه وتقول..انتي دايم تدخلين غلط بعدين بكيفها خليها تقول
اللي تبي وحنا نحتفل...
تفاجئت وسكتت عاد المعلمه ردت عليها وخذت اسمها مع التهديدات أكيد..
ردت علي المعلمة وقالت خليك من الفلسفة وردي مكانك..
قلت ليش تقولون فلسفه والبنات بعد يقولون اتفلسف..
هذا كلام الفاشلين..وتبون تكونون بعقلياتكم المتحجره..
لامنطق..لااقناع..لاكلام صحيح..عاد شوي تثقفوا وحاولوا
تتعمقون بالدين اهم شي هذي مو فلسفه...عاد سكت لاني ادري مافي فايده في البنات
مهما قلت كله يحقرون..؟ مادري على شنو..
قلت لها..في مقوله تقول.{ قليل من الفلسفة يجعل الإنسان يميل إلى الإلحاد
لكن.التعمق في الفلسفة يقرب عقل الإنسان من الدين..}
وهذا أنا عاد شنو ردك...
ردت علي وقالت مافي أي شي يثبت ان كلامك ونقاطك اللي قلتيها صحيحة
اثبتي لي ..؟
قلت لها والله كنت ابي اثبت لك لكن الكتاب هذا صار لي فتره من وقت ماقريته
وفي أدله دلت على ذلك لكن مو مذكرتها...ومادري الكتاب وينه الحين..
ابتسمت وقالت..شفتي كلامك كله ظلال ومو صحيح..
رديت..لاحول ولاقوه مصره على كلمه ظلال..
بعدين ماتدرين شنو معناها...ومافي احد يرضى تقولين له هالشي..
عاد كلن يحترم نفسه..صراحه نرفزتني..؟
قالت..انا مو محترمه انزين انا بعلمك...
رديت ..قلت بعد اذنك ترى صار لي فتره ساكته وانتي تسبين
في الكل والكل ساكت لجل لاتحطين احد ببالك وتظلمينا بالدرجات
عاد انا مو خايفه من احد لاني واثقة من كلامي ولو احد يدري باللي تقولينه
ماراح يسكتون لك ابد..
الله لايوريكم شنو أعملت فيني وماخلت شي الا وقالته
عاد انا رحت مكاني وأعطيتها ظهري ..
لاني جد ماطلعت معها بنتيجة..
جنت المعلمة وقالت انتي طالعيني اكلمك..
قلت نعم اسمعك..قالت شلون تمشين وأنا أكلمك..
قلت لها أنتي قاعدة تغلطين علي وأنا محترمتك وتقولين كلام كبير بحقي..
اجل تبيني اسمعك..لا والله..
هاوشتني وخذت اسمي وتخيلوا شنو قالت لي..
قالت درجاتك والله ماتاخذينها وكل حصة ابيك تكونين
واقفة بحصتي او الأفضل مااشوفك..فيها..
عاد أنا صراحه مادري شقول ميتة ضحك عليها جد انها نفسيه..
قلت درجاتي لا لي حق اخذها باخذها ومافي احد يقدر يظلمني
دام انا متفوقة واستاهلها..
اهيا احقرتني وطلعت وبديت أتناقش مع البنات ليش ماوقفوا معي..
جد ان أهما مو كفوا من قدام معها ويبتسمون ومن وراها
لاحول ولاقوه بس..
ترا أنا قادره أرد عليها بنفس أسلوبها لكن ماحبيت انزل مستواي لمستواها
خصوصا اني احاول احافظ على احترامي وصيتي بدراستي..
عاد هذي مو معلمه جد انها اهيا سئه جدا وماينفع تربي أجيال..
واجهت الكثير من الانتقادات من البنات ويقولون مااحد قالك
تطاولي عليها...ربي يشهد علي اني ماكنت ابي ارفع خشمي على احد
او اتطاول عليها او ابين لها اني فاهمه واحسن منها..
لاوالله كل اللي كان في نيتي انني اصحح غلطها وااسكت لها الشي
واصحح لها كلامها اللي قالته بأسلوب غير لبق ابد..
عاد اعلنت الحرب معها والله يستر جد راح اتعب طول السنه
لكن درجاتي وربي راح توصلني..
في النهايه حابه اطلع لكم بأسئله حيرتني..
1ــ تتوقعون هذا أسلوب معلمه تعامل فيه طالباتها..من طريقه التعامل والألفاظ..؟
2ــ ليش وقت نقول الحق الكل يعتبرها فلسفه او لعانه منا وما يتقبلها..؟
3ــ تعتقدون كان معي حق في اللي عملته او كنت غلطانة..؟
اعتذر عالاطاله صارت أشياء كثير لكن حبيت اختصرها بقدر الإمكان
وأتمنى تكونون حقانين وتعطوني أرائكم..بحق...
تعبني الموضوع من كثر مافكرت فيه..مادري اذا راح ادفع ثمن كل اللي صار..
فقط لمجرد محاوله الدفاع عن نفسي وماحبيت اسكت عالغلط...
اجل هذا الثمن اللي راح ادفعه..صرنا نسكت عالغلط وعن حقنا بعد..
لجل لانخسر اشياء بحياتنا..ليش وشنو الحل..
او البعض مايتقبل اراء البعض اللي مايكونو من المنطقه..
سالتني انتي من هنا رديت وقلت ايه قالت مو مبين من كلامك..
شرحت لها وقلت من هنا لكن قبل كنت بالكويت..
عاد تدرون شنو ردت علي..
قالت افكارهم هذول اكيد تعلمتي منهم وتبين الظلاله..
بالله عليكم الكلام هذا يرضي احد والله لو اني قلت لهلي مادري
شنو كان صار..
ليش مايتقبلون الاراء..
حتى الاجانب مثلا ان ابدوا الرأي بشي مااحد يتقبل والاحظ بكثره الكل
يطالعهم بنظره استحقار او اللا مبالاه..
كافي اني في ديرتي ويحصل معي هالشي..ليش عاد..
مو بشر مثلنا ولهم رأي مثلنا وحقوق او لانه مو من اهل البلد ويتم ساكت..؟
هالشي ماينسكت عنه واتوقع اني راح اشتكي لانها حاطتني براسها وواثقه انها
ماعملت شي غلط..جد وقاحه..![أتـهـمـت مـدرسـتـي بـالـكـفـر...؟][](http://www.al-amakn.net/vb/images/smilies/mad.gif "Mad")
اعتذر لكن جد شي يقهر ..وين حقي...![أتـهـمـت مـدرسـتـي بـالـكـفـر...؟][](http://www.al-amakn.net/vb/images/smilies/frown.gif "Frown")
شلون اتعامل معها اجل..وليش الكل ساكت لها..
واهيا مو خايفه من اللي عملته معي..
ابي حل منكم..قبل لاتنتشر السالفه..
ورودا على اسئلتي لجل تختصر ردكم عالموضوع..
اعتذر بعد عالمبادره مره اخرى..
تحياتي..كــبــريــا ء الــ ج ــنــوبـــ*
![أتـهـمـت مـدرسـتـي بـالـكـفـر...؟][](http://img105.herosh.com/2010/08/03/768628599.gif)
DF HjJiJlJj td lJ]vsJjJd fJhgJ;JtJv>>>?DF