الموضوع: ][ أتـهـمـت في مـدرسـتـي بـالـكـفـر...؟][
عرض مشاركة واحدة
قديم 01-10-2010, 03:31 AM
المشاركة 4
الصورة الرمزية نفحة العود
نفحة العود
عضو صافح الغيم
  • غير متواجد
رد: ][ أتـهـمـت في مـدرسـتـي بـالـكـفـر...؟][
حبيبتي لجين :

أتمنى أن تكونون حقانيين وتعطوني آرائكم بحق << جمله ذكرتيها

وما ادري يمكن ما تتقبلين رأيي بحكم كوني معلمه لكن ما يمنع اني اشرح لك وجهة نظري


في البدايه انا ما اعفي المعلمه من الخطأ .. بالعكس يطولها جانب من الخطأ انها كانت فظه شوي معكم وهذا اللي كان سبب في عدم تقبلكم للنصح منها

لكن اجد كثير من الأخطاء ماهو أكبر من فظاظة المعلمه وهو بعض السلوكيات اللي صدرت منك !

اولا المعلمه ما اثار عصبيتها ماهو آتي :

1- حكم عيد الميلاد وهذا ما يختلف عليه اثنين ... وهو فعلا تشبه بالغرب .. يا لجين مو علشاننا نبي شي وعاجبنا ننكر بداخلنا وايضا امام الناس انه شي احنا نبيه وانه ليس تشبه بالغرب !
هذي حكمها صريح عند المشايخ والنبي صلى الله عليه وسلم بين ان المؤمنين لهم عيدين بالسنه فقط !
ترا عيد الميلاد ما يفرق عن عيد الحب بشي !
2- انكم خالفتوا نظام من أنظمة المدرسه وانتي عارفه انه الشي اللي سويتوه مخالف لقوانين المدرسه صح ولا لا ؟
3- اكيد انكم باحتفالكم سويتو ضجه (( لا تقولين ما سوينا ترا البنات ما يحسون بارتفاع اصواتهم )) << نقطه نعاني منها (( المعلمات ))
وهذا الشي اكيد هو السبب الرئيسي اللي خلاها ترفع صوتها عليكم !


نجي لتصرفك :

قم للمعلم وبه التبجيلا ..... كاد المعلم أن يكون رسولا

أنتي تقولين أنك احترمتي معلمتك -- طيب لجين بكون شوي قاسيه عليك بس تحمليني (( صدقيني لمصلحتك ))
تعتقدين يا لجين انك احترمتيها لما قمتي ووقفتي وقعدتي تناقشينها قدام جميع الطالبات !!!!
حتى لو كنتي على صح وعلى صواب ما تقللين من قدر المعلمه وتطلعينها أنها على خطأ أمام الطالبات مهمااا كان !
لانها لها احترامها وهيبتها وانتي بتصرفك هذا قاعده تحاولين تهزين هيبتها قدام البنات وتخلينهم يضحكون عليها او حتى تفتحين الباب لباقي البنات في التطاول على المعلمه !

لو كنتي فعلا محترمتها يا لجين وكنتي بقناعتك انها فعلا على خطأ كان سكتي وشفتي اي حصه انتظار اننتي فاضيه فيها وتروحين لها وتكلمينها على جنب وتناقشينها بينك وبينها على هدوء اما هي تقتنع منك او انتي تقتنعين منها !

(( انصحني ولا تفضحني ))
نسويها للجميع ... فما بالك بمعلمه المفروض تكون لها احترامها ومكانتها قدام الطالبات
تخيلي معاي يا لجين أن اختك الصغيره جايه قدام صديقاتها وانتي اكبر منها بكثير وتجيك تنصحك قدامهم وتقول لك انتي خطأ واسلوبك غلط !


ثانيا كلمتك لها :
عاد كلن يحترم نفسه !!
بصراحه يا لجين الكلمه هذي ما توحي باي ذرة احترام منك للمعلمه
أخطأتي بحقها خطأ كبيييييييير كبيييير !!
حتى لو نرفزتك ما تتكلمين عليها !
عندك اعتراض كلميها بعدين - او قدمي شكوى او خلي امك تجي تتفاهم معها بس ما تتلفضين على معلمتك بالكلام هذا وتقولين انها نرفزتك !
اذا تشوفين ان النرفزه سبب يشفع لك بالتكلم بالطريقه هذي اذن ما نعتب على المعلمه في اي كلمه أخطأت بها عليكم لانكم (( نرفزتوها )) !

وغيره تصرفات كثير منها لما قالت لك ناظريني ورديتي قلتي اسمعك << ايضا بصراحه اسلوب خاطئ

صدقيني يا لجين المعلمه انتم باعماركم يمكن ما تتقبلونها لكن خليك تتعبين او تدوخين بالفصل او تمرين بظروف او حتى تحس المعلمه ان مستواك متدني راح تلاقينها اول من يفزع لك !

اما مسألة الدرجات فأنا اقول لك (( ترسيب ما راح ترسبك )) لكن ممكن تنقصك درجتين لانه بعض المعلمات يحطون درجتين على سلوك الطالبه معهم -- ايضا ممكن انها بشكواها ضدك تخصم من علامات السلوك وبالتالي تحرمين من شهادة حسن السيره والسلوك - وبدون هذي الشهاده ما اعتقد راح تنقبلين في اي قطاع تعليمي آخر !


أنتي أخطأتي خطأ أكبر من خطأ المعلمه بكثييييييير
فلذلك أرى أنك تقدمين لها أعتذارك وأسفك وبعد ما تقدمينه لها وشفتيها تقبلته ذيك الساعه ادخلي بالموضوع معها واشرحي لها وجهة نظرك وشوفي وش عندها



معليش اسمحي لي يمكن قسيت عليك حبتين - او بتقولين اني معلمه شي اكيد اني بوقف معها
لكن انا ابقول لك اني قسيت عليك لمصلحتك
وانا هنا اعرف لجين ما اعرف معلمة لجين علشان اوقف معها

يعطيك العافيه

دع الأيام تــــفعـل مـا تشـاء وطب نفساً إذا حكم القضاء
ولا تجزع لحادثـه الـلـيـالـي فــما لحـوادث الــدنيـا بــقـاء
وكن رجلاً عن الأهوال جلداً وشيمتك السماحة والوفـاء
وأن كثرت عيوبك في البرايا وسـرك يـكـون لــهـا غــطـاء
تـستـر بالسخاء فـكـل عـيـبٍ يـغـطـيـه كــمـا قـيـل السخـاء