رفقآ بالقوارير يامعشر الرجال ..
مسيكم بالخير جميعآ ..
كيفكم مع البرد اكيد الكل تعبان ويكحكح ومزكم ماعليه اجر ان شاء الله .. زمان عن الأماكن والنقاش فيه
بدخل في الموضوع مباشره .. وموضوعي غير معممم
سبحان الله طبيعتنا الصحراويه وعيشتنا في هالصحاري القاحله اثرت بشكل كبييير على رجالنا وشبابنا ..
وحتى اكتسبوا عادات ومبادئ عجيبه ماانزل الله بها من سلطان ..
الاحظ في مجتمعنا غالبآ المرأه تعامل زوجها معامله حسنه واذا عصب من شي اذعنت له بإحترام وصمت حتى لو كان كلامه ضد كلامها او مااعجبها لكن ربيت على احترام الزوج وطاعته طاعه عمياء ..
الحمد الله هذا شي طيب وبالعكس حلاة الأنثى في هدوئها واحترامها لزوجها ..
لكن في المقابل نشوف الرجال مايملى عينه شي .. الاحظ بعض الرجال يدعي المثاليه واني اعامل زوجتي بحب واحترام لكن من اي موقف يعصب فيه ينسى نفسه ويطلع على حقيقته ويتلفظ بألفاظ على زوجته زي مثلآ .. انتي ووجهك او وش انتي متعوده ؟ اسلوب تحقير !
ولا مثلآ زوجته قايمه بواجباتها على اكمل وجه وقايمه بأهله وحاشمتهم واذا اشتكت له
بتقصيرهم في حقها قالها .. هم جايين لي لبيتي ومالك منه ولامعروف عليهم !
الحين لو تطلع هالزوجه من بيتها .. بيقدر الزوج يعزم وينادي اهله ؟! ليش هالطبع في بعض رجالنا نادر مايعترف بأفضال زوجته عليه .. نادر مايشكرها على اي عمل تقوم به له !
للأسف كل اب يربي بنته على الخضوع التام للزوج ومهما قال لها لازم تتغاضى وتحافظ على
بيتها مقابل كرامتها !
حضرت موقف لقريبه لي كبيره في السن وزوجها ينشهد له بالأخلاق بين الرجال .. يتصف بالحكمه وله كلمته في المجالس وبين الرجال بس استغربت كان يكلمها في الغرفه المقابله للمكان اللي انا فيه ونقاش بينهم بسيط الا يقولها لاتتشرهين انتي ووجهك بس !
وزوجته ماقالت ولا كلمه .. ويوم جت لي استغربت وانتقدتها ليش تسكت قالت يابنتي هذي الدنيا وبكره تربيك .. وش تربيني عليه على الذل والإهانه ؟!
المشكله ان هالنوعيه من الرجال لاصاروا راضين مافيه احلى منهم لكن خليه يعصب يدور اي شي يحقر به زوجته او يهينها به !
ليتهم حطوا هالآيه ( وعاشروهن بالمعروف ) نصب عيونهم كان احنا بخير
ارآئكم حول هالنوعيه من الرجال !
vtrN fhgr,hvdv dhluav hgv[hg >>