عجّل عليْ برجعِتك وش تنتظر=ياخذني الموت وعقب تذكِر تجي !
مابيك تمشي في عزاتي واتحَضِر=لو في حياتي مامشيت فـ مَدْرَجي
وبطاري الموته .. تراني احتضِر=والحل بيْدك وابيديك امعالجي
شفني عقب فرقاك حالي مايِسِر=الوجه شاحب والشّعَر متبهرجي
عيني كساها السّود من طول الهجر=كُحْل السّهر بآ يَهْلِك اعيون النّجي
حتّى ابوي اليا لقاني يختضِر=ويقول من بعد العياذ اتمكيَجي
اشتقتلك ولقعْدِتك بعد العصِر=ولضحكتك ولصوتك العذب الشّجي
ولسُبحِتك ولغترتك حتى العِطِر=ولجزمتك ولمَشْيتك يالعربجي
هذي القصيده شوفها مابه كسِر=مافيه بيت ٍملتوي ولاّ اعـْرجي
صفّيتها بحساس قلبي والحبر=مابيك تمدحني ولا بيك اتـْهَجي
لو مـَــ اعْجِبتْك ابيات شعري اعتِذِر=لجلك بغيّر مفرداتي ومنهَجي
وبآ قصّ لك قصّة شقايْ المستمِر=وآبآ أغنيلك اغاني المُرتَجي
وأكمّل بدور المُحِب المنتَظِر=لين الحبيب يحن ويقرر يجي