تعبت أضم البحر واهدي أمواجه
تعبت أجامل وأشوف الوقت يسرقني
شكواي للي عليه الضيق وافراجه
اللي إذا شاء يرحمني ويرزقني

أما انت يابو جبين عقّد احجاجه
لاعاد تسأل علامك منت طايقني

الناس كلٍ على دربه ومنهاجه
وأنا عن الناس مابه شي يفرقني
إلا اني دايم أحب الصدق وأواجه
مخلوق والله على هالوضع خالقني

حتى رفيقي ضماد القلب وعلاجه
على كثر ما أتمسك فيه صدقني
لو ادري انه مرافقني على حاجه
لاامسّكه حاجته وأقول فارقني