الموضوع: ( يوميات لا تنســـــــــــى )
عرض مشاركة واحدة
قديم 19-05-2008, 12:43 AM
المشاركة 11
الصورة الرمزية ( النرجسيـــة )
( النرجسيـــة )
عضوتربع القمه
  • غير متواجد





فى اليوم الثانى

قعدت على صوت المنبه .. موعدي للحمام المغربي بعد نص ساعه ..
انا بأي مناسبه ..
لين متضايقه .. او فرحانه ..
لين متملله .. او حتى مشغوله ..
احب اريح روحي بالحمام المغربي .. احس اني اطلع فررررررررررش ..
اتمزلق .. او اللي اروح لها تينن فنانه او مكانها وايد نضيف ..
بس مواعيدها بالطق او لازم مايطوفني الموعد .. قمت ركضه ركضه زهبت هدوومي .. او طرت
البيت كان سهده محد فيه المهم طلعت او وصلت الصالون .. سويت سمكره
حمام مغربي او حلاوه
او سكراب او حمام زيت لشعري .. خذ لي 3 ساعات او اكثر ....
المهم ركبت السياره او قعدت اتمشى على سعتي ..
المهم .. كانت عندنا وحده من ربعنا ابوها متوفي .. العصر رحنا لهم انا او امي شوي
او بعدين رحنا المجمع نتمشى



سوالف عادي
تسوقنا شوي .. شريت لي جوتي يديد للبدله باجر ..
مع انه عندي جوتي يناسبها بس امي لزمت على اخذه ..
ههههههههه تبي تحس انه في شي يديد الظاهر ..
المهم تفرفرنا بالمحلات ..
او بعدين رحنا قهوة Paul
انا اكلت سيزر سالد او امي شربة عصير برتقال .. كانت بتطلع بالليل تتعشى مع ابوي انا ماتغديت ..
المهم سولفنا شوي .. قالت لي السوالف اللي تعرفها عن المره .. او وين كانت تشوفها
بهالجم يوم احس امي مو على بعضها ..
خايفه تكلمني او اعصب او اقول لها لاتضغطين علي ..
ودها نتكلم بالموضوع بس ماودها اهيا تفتح الموضوع عشان ماتضايق ..
تعرفني اذا ضغطو علي تنقلب عناد ..
المهم انا حسيت فيها ففتحت الموضوع
قلت لها ترى يمه عادي .. انا اللحين خلاص جد قاعده افكر
او ماعندي مانع للزواج اذا الريال كان مناسب او الله كاتبه من نصيبي باخذه ..
او قوليلي اذا عندج شي ..
قالت لي انا ابي افرح . انا بزواج اختج ماكنت فرحانه كانت دايما تحسسنا انه احنا
ضاغطين عليها لكن شوفيها اللحين شلون مرتاحه مع زوجها ..
انا امج او لي نظره بالناس .. مابيج تاخذين بنظرتي بس انا
لكن خلي بالج مفتوح او تقبلي مني انتي بنتي او اكيد انا مابي لج غير الزين
قلت لها انشاءلله .. انتي استانسي عادي .. بنقعد او بنسولف ويا المره ..
تقول ابوج بهاليومين بدى يسأل .. رفيجه دايما يقعد بديوانية ابو الولد ..
ويمدحهم وايد يقول خوش ناس ..
او الولد متعلم بامريكا او مركزه وايد زين او له مستقبل ..
او عندهم خير بيعيشونج مثل ماانتي عايشه انشاءلله

او سأل بعد رفيجه معاه بنفس الوزاره .. او قاله الولد طموح
او مؤدب وبادارته الكل يحبه او مسؤوله وايد مرتاح منه .. او قاعدين يتهاوشون عليه يشتغل بضمير
او مايطوف الصلاه .. يقول دايما التقي وياه بالمصلى الظهر .. او اسولف وياه اسلوبه حلو او زين

انا مرتاحه او حتى لما استخرت نمت او حلمت كأنه يايتني مره او ماعطتني سله كله عود قطع كبار
او في بينهم ذهب .. او قالت لي هذي حق بنتج اللي اهيا انتي ..
قالت لي الراي الاول او الاخير لج .. احنا هذي مسؤوليتنا او انتي شوفي ..
قلت لها معليه باجر بنشوف شسصير او الله يكتب اللي فيه الخير ..
قالت لي انشاءلله ويفرحني فيج ويبلغني اشوف عيالج او عيال عيالج ..

يا ابوي اخذ امي من المجمع او انا رجعت ..
كنت تعبانه لويه من الصبح .. رحت البيت قعدت اعدل بكبتي ..
وقطيت اللي مابيه ..
او نمت




ستبقى ياقلبى لكـ نبضات نرجسيــــــة
فسأجعلكـ عاليا محاط بجدران الماسيـــــة
وأكتب عليكـ ممنوع اللمـــــــــس