اليوم صار موقف طريف <<طريف وإلا عرعر كح كح<<من أولها غبار؟ >> وقلت لازم أهذره عليكم .. هو ينرفز شوي .. بس يوسع الصدر لأنه يدل على دلاخة الطرف المقابل في بعض الحالات


واحد من الزملاء في العمل .. اتصل عليّ بالمكتب .. رديت عليه .. سلام وعليكم السلام .. ووش الأخبار ووشلونكم ومن هالمشوار اللي مخسرن السعوديين في المكالمات ومكسبن شركات الاتصالات <<مسكة خط دائمه في السلام

المهم بعد حوالي دقيقه أو أكثر من هالحتسي .. طلع بسؤال من جنبها .. زيه طبعا <<أمحق ميانه>> حسيت انه شق جبهتي بذا السؤال وفكرت أرزع بسماعة التلفون وأصكها بوجهه


قال : انت فيه؟!!!

قلت : لا .. لحظه بأروح أدورني في المكاتب الثانيه .. وأناديني علشان تكلمني

نعنبو قلبك من اللي رادن عليك ويحاتسيك من اليوم .. انت مهبوول وإلا دلخ؟ .. وش ذا السؤال؟!

عاد هو تفشّل وحسيت انه طاح وجهه وراح يلقطّه .. بتقولون وش دراك؟ .. لأني سمعت صوت شي ثقيل ينشال عند التلفون خخخخخخخ <<وجهه كبير

ويقاله بيصرفها .. قال :
لا أنا قصدي انت موجود .. لأني بأجيك؟!

طلع نصاب .. وفعلا مصرّفها .. لأنه قضى الدوام ما جا



ما علينا .. هذا بأتفاهم معه بعدين <<يا ويله ماسك عليه شي الحين >> .. لكن ذا السؤال يذكرني بأسئله غبيه .. نسألها لبعض بشكل يومي .. بدون ما نحس إنها قمة الدلاخه

زي مثلا .. الواحد إذا دخل على أهله وإلا ناس يعرفهم .. وقالوا له : انت جيت؟!!

أجل من ذا اللي قدامكم انت وياه .. أنا وإلا شبح <<شبح وإلا بانوراما كح كح <<يا قدمك