كيفها دنياك .. بعد ابتعادي؟
وكيف جو الليالي .. في غيابي؟
وكيف جوك .. عساه اليوم هادي؟
من غير زعلاتي .. وزعلاتك
وهمساتي .. وضحكاتك
ووش صار على حبك للدلع
وكثر شرهاتك؟
وذيك السوالف
وحبك لكثرة عنادي؟

وكيف .... ؟
وكيف .... ؟
وكيف .... ؟
آااه من كثر الأسئله
وحيرتي
وغيرتي
ومن الوجع
ومن هم بقلبي يقتله
ومن درب مشيته .. وما وصلت
ومن قلب صدفته .. وعشقت
وظنيت إني ملكته
إني احتويته .. وما عرفت
إني فعلا أجهله
إن الغرام خلاني كفيف
ما أشوف اتجاه البوصله

طمنيني
عساك انتي غير عني
وعندك الوضع عادي؟
وعساك براحة بال؟
من رجتي .. من الموال
اللي صدع براسك
وأرهق إحساسك
موالي .. كل ما فقدتك .. سألتك :
جنوني .. وينك؟ .. غيابك طال!
طمنيني .. عساه زان الحال؟
وطاب الفال؟
وعسى مرتاحه بين أهلك وناسك

كنت أدري إنك لثاني
وأتجاهل وضعنا
حتى وحنا مع بعضنا
كنت خايف
لأني عارف
بأي لحظه بخسرك
وأتذكر .. يوم ما كنت ألومك
وأرجع ألوم نفسي .. وأعذرك
وأقول هذا حظي
وهذا اللي ربي عطاني
عشقي .. قلب واحد
لكنه .. مع إنسان ثاني
بس شي يقهر
كيف تخدعنا الأماني

إلا على طاري الأماني
تذكرين .. في سوالفنا عنا
كيف كنا؟
مع الهستره
كان يتحول الجد مزح
ولما يزيد المزح
تبدا الطنقره
ويرجع المزح رزح
ونزعل ثواني
ونبدا نتذكر صاحبتك أماني
ونحكي عنها وسوالفها
وطبيعتها .. ومواقفها
ونضحك على لقافتها
ونتعجب من ثقافتها
الله يسامحنا
ويسعد ذيك الـ أماني
كيف كانت تغير جونا
حتى لو تونا
ما حكينا في الأماني
وكيف أسرني غرامك
وكيف بعثرتي كياني
آااه بس .. يا زماني
ليتها تدري أماني
عن هوانا
واللي جانا
وكيف تخذلنا الأماني

المهم ..
خليك مني
ومن باقي حناني
وطمنيني عنك
كيفها دنياك؟
وأخبار صاحبتك أماني؟!