الموضوع: مذكراتـ .. جامعي .. ولكن
عرض مشاركة واحدة
احصائياتى

الردود
22

المشاهدات
1383
 
نجيب العجيب
عضو عطاءه غير

نجيب العجيب is on a distinguished road

    غير متواجد

المشاركات
314

+التقييم
0.05

تاريخ التسجيل
Jun 2006

الاقامة

نظام التشغيل

رقم العضوية
2433
03-07-2006, 09:08 PM
المشاركة 1
03-07-2006, 09:08 PM
المشاركة 1
مذكراتـ .. جامعي .. ولكن
مذكـــراتــ / (:d) القرص المحلي / جهاز الكمبيوتر / نجيب العجيب

طبعاً حبيت اطرح هذي القصة بناء على طلب أختي المصرقعة .. الله يرضى عليها ..والان في صدد التحضير للمسلسل الي راح تكونين انتي من ضمن احد الابطال .. وراح يكون كثير من الاعضاء مشاركين يا بطولة او تمثيل .. كل واحد وشطارته بالتمثيل <-=-=-= جالس يدرس وضع كل واحد عشان يرتب الادوار
وبس عطوني اشوية وقت لانه طويل ..


كلمة الاعضاء : الادارة المراقيبن والمرقبات المشرفين والمشرفات الاعضاء .. كلنا واحد ولا فيه فرق.


يقولون من طلب العلا سهر الليالي ويقولون من جدّ وجد ومن زرع حصد وأقول طلّ ما عليكم من ذا الحكي اللي مآخوذ خيره....تبون تعرفون قصتي طيب سمّوا بالله واسمعوا ولا تضحكون ولا تتريقون.... اتفقنا.....



قدّر الله علي وتخرجت من الثانوية بنسبة 98.77% علمي طبعا وش رايكم نسبة تفتح النفس بس قبل كل شي قولوا ماشاء الله ...المهم تو اسمي طالع في الجرايد لأول مرة في حياتي ولا تلفونات المهنئين والمباركين من الصباح الى صلاة المغرب ..ومن بعد صلاة العشاء الا واسمع هواش بين أمي وأبوي قلت يا ولد بس هذي عيون الناس ما امداني انجح واجيب نسبة الا ويصكوننا بعين وانزل ابي اشوف وش السالفة والقى أبوي يقول جوية وأمي ترد عليه طب بشري ..أبوي يقول طيار عسكري ,,,يا ما كان نفسي اصير طيار عسكري ..وأمي ترد عليه لا قلت طبيب يعني طبيب زي ولد خاله ولا تبي يقولون ولد فاطمة احسن من ولد نهلة (اسم أمي نهلة ) ويرد عليها أبوي مو على كيفك طيّار يعني طيّار وأمي تقول لا طبيب يعني طبيب ساعتها أنا تدخلت ...وسألتهم ممكن اعرف يا شباب من أنتم تحكون عنه لو سمحتوا ...وجاوبوني بصوت واحد عنك يالدعلة قلت لهم عفوا يا وائل وأنتي يا نهلة بس أنا ما ابي لا طيران عسكري ولا أبي طب بشري ..ابي كلية الحاسب الآلي ويثاغون في وجهي وش تبي بالحاسب تبي تجلس طول عمرك مقابل هالكمبيوتر قلت لهم أجل تبون اجلس أطالع في خشش البشر ( خشش =جمع خشه أي فم )ولا بطونهم ولا سيقانهم ولا تبون أجلس بيني وبين الأرض حول 5000 متر وحروب وطلق صواريخ أنا فاضي لكم ..وما دريت الا هم يهبون فيني وأبوي يقول لي معصي وأمي تقول لي بتدخل طب غصب عنك وشوي وصلت الى استخدام ادوات العنف زبيرية أبوي وأمي ارسلت لي على الطاير فيونكتها ..المهم أنا قلت ساعتها العطة يا بطة وانحشت الى غرفتي ...وفي غرفتي بديت أفكر وشلون اتخلص من ورطة الطيران والطب أنا أبي حاسب وش أسوي وش ما أسوي أخيرا طرت لي فكرة أنحشت الى محل نظارات وأروح للباكستاني اللي هناك و أتفق معه انه يسوي لي نظارات خرطي أي كلام ويكتب لي مقاس نظر دمار مرة وبالفعل رحت لبيتنا وانا علي نظاراتي ...ورحت اعلم ابوي...

أنا: يبه ودي أصارحك بشي بصراحة أمي ما عندها سالفة أجل تقول طب وين وش تبي أمي,, أصلا الطب للبنات هم الي يمشون وينجحون الواحدة أذا دخلت على الدكتور على طول يصكها بنجاح اما التماسيح فلهم الله ...وبيني وبينك انا من زمان و ودي أدخل الجوية بس شوفة عينك كنت أحاول أخبي عنك الصدمة ان شوفي شجر يعني يالله يالله أشوف اللي قدامي وماراح يقبلوني على كذا .:::

أبوي:يا عبدالعزيز قل غيرها تكفى يعني أنا أفشل في الفحص الطبي وأنت بعد بس لا لا يمكن والله لا أسوي لك عملية ليزكس (ترقيع النظر بالليزر ) مهما تكلف

أنا : لا يبه ويرحم والديك وش ليزكسه أصلا أنا عندي انحراف في البصر بعد وأزيدك من الشعر بيت شوية موية بيضا وموية ورد بعد في عيني اليسرى ويقول الدكتور بعد في موية خضرا مدري ايش عندهم و شكل عدسة عيني اليمنى متشققة والله يا وبيي اني من ساعة ما دريت وأني مثل اللي مفقوعة مرارته ..وقام أبوي مثل بيتر يوم اقفت عنه هايدي وراحت فرانكفورت قام يبتسي ويقول يعني ما راح تدخل الكلية الجوية وأنا أطبطب عليه كأنه ولدي بس للأسف أمي كانت مارة من حولنا ولقطتني وقالت J الحمدلله يا وليدي أخيرا اقتنعت هذا النظر المناسب لطلبة الطب وبالفعل سجلت في كلية الطب البشري في جامعة الملك سعود ...

وعزمّت أيام التسجيل أني أخربها بأقصى ما عندي وفي اختبار القبول خربتها قمت أحل أي كلام وقلت في نفسي بارجع لأهلي سقطت في الأختبار ..وخلاص ما بقى لي الا الحاسب مير مالي في الطيب نصيب لقيت اسمي ثاني اسم في قائمة اللي نجحوا في اختبار القبول (يلعن ابو الحظ الردي ) وفي يوم المقابلات جيت متأخر ساعة قلت بس بيقولون هذا ما ينفع مير تحس أنهم يدوروني دوارة ..توني أجلس وأشوف الشباب ينوحون اللي يقول ان اللي قابلوه قالوا له أنت دلوعة واللي يقول قال له الدكتور نسبتك خراط واللي يقول له الدكتور رح الآداب اصرف لك يوم هوايتك القراية ...قلت لنفسي بس يا ولد ادخل عند الدكتور اللي بيقابلك وخربها معه ..وأدخل على اللجنة وأشوف دكتورين كل واحد منهم مكشر وأقول في نفسي يا مهنا جاك ما تمنى ..سئلني الدكتور الأول : كم نسبتك

أنا: مالك دخل ماني قايل لك أمي تقول لا تعلم أحد علشان الناس لا يحسدونك


الدكتور الثاني: اها المهم يا عبدالعزيز ليه تبي تدخل الطب


أنا: يا أخي أمي تبيني أدخل الطب ولا بيني وبينك مابي كليتكم من زينها


الدكتور الاول: طيب يعني لا سمح الله لو رفضناك ولا قبلناك في الكلية وش بتسوي ؟؟

أنا: الساعة المباركة يعني اللي خلقكم ما خلق غيركم جامعة الملك فهد ظفرها برئبتكوا

الدكتور الثاني: يا عبدالعزيز لو يجيك مريض يقول لك ما أبي دكتور سعودي يكشف على ولدي وش بتسوي له؟؟


أنا: بافتح له الباب وأقول اطلع برا و على فكرة أنا مثلك بعد ما أرضى أن دكتور سعودي يكشف علي من هالعلم اللي في روسهم


الدكتور الأول : طيب آخر سؤال هل أنت مستعد لأنك تتستلم مناوبات في الليل في المستشفى وتسهر على راحة المرضى ؟؟


أنا : لا طبعا شرهتك على اللي بيجلس في المستشفى بعد الساعة 12 الظهر أنا الزم ما علي التوقيع وبس والوجه من الوجه أبيض ...وما وعيت الا هم يقولون لي تفضل انتهت المقابلة طبعا المنطقي والواقعي أنهم بيرفضوني ولا راح يقبلوني في المقابلة الشخصية بس و أنا جاي أشوف النتايج هالمرة مو ثاني اسم الا أول اسم في قائمة المقبولين في الكلية ..( يلعن أبو القهر ) و خلصت كورس الانجليزي بتفوق ودخلت دورة العلوم الصحية ..في أولها كنت مضيع ومطنش علّ وعسى ما أدخل الطب بس للأسف كنت أجيب الدرجات العليا ساعتها قررت ارضى بالنصيب واذاكر ووقتها بدت الدحدرة ومن خسف لي خسف الى ان صار الحدث الجلل كنت في معمل البايولوجي وكنت وقتها بديت اتحمس وأحب الطب وذاك اليوم بنشرح ضفدع والمعيد الهندي يقول لنا نيكست يير يو ويل دو ثيس ان هيومان بوديز ...وأنا متحمس وأقول بس قبضنا الصفدع ولا عليك وتوهم يسلموني الضفدع وهو يتراقص قدام عيني وتوني اخنقه بالمخدّر وادعس السكينة في رقبته الا وحينئذا (حلوة حينئذا ) ينطفي الكهرب علي ..تخدرت قبل الضفدع وطحت على الأرض وشوي شوي قاموا الشباب اللي معي والمعيد يصحوني بكلونيا وعصير المهم قمت وخلاني المعيد بس اتفرج على زملائي ..مير ماش ما صملت توني أشوف قلب الضفدع بيد أحد الطلاب مدري وشلون جاني أحساس اني ضفدع وأن ذاك الولد بيشرحني وووو دب في الأرض مرة ثانية خبطت بس هالمرة ما صحيت الا في أسعاف مستشفى الملك خالد الجامعي ..وبعد ساعتين ففي قسم الأمراض النفسية يوم الأستشاري سمع قصتي قال لي يا عبدالعزيز نصيحتي لك اترك الطب اللي دروخت على ضفدع وش بتسوي وأنت سنتين بتقابل وتشرح آوادم على العموم هذي نصيحتي لك ....وبالفعل سمعت كلامه وفصلت من الجامعة بعد ما أقنعت أمي أني مو كفو طب وجلست شهر صايع وجت أجازة الصيف ورحت أقدم من جديد في جامعة الملك فهد للبترول والمعادن أبي كلية الحاسب الآلي ...

وصلت الشرقية وقدمت مع المخاليق وكنت ثقل وكلي عزيمة وأرادة أني أدخل كلية الحاسب الآلي وبالفعل وفقني الله بعد مقابلات مدري وش صار فيها اللي يقول لي لو قبلناك تدري أنك بتعيش في جحيم ..رديت عليها النار بوجودك جنة يا دكتور وكن ردي ما أعجبه والثاني يقول لي ترى ماعندنا استهتار ولا لعب مو بين المحاضرات تنقز للبحرين ترانا عارفينكم يالطلاب مرابطين هناك...قلت أبشرك طال عمرك جوازي في الرياض عند أمي قافلة عليه يعني مسألة البحرين اغسل يدك منها ...المهم بعد كل هالمرمطة قبلوني وبديت دراسة سنة الاعداد ( ما تلاحظون عمري كله بيروح على سنوات الاعداد المهم ما علينا ) وبالفعل درجاتي كانت حلوة والاحلى من هذا كله لغتي الانجليزية كانت رهيبة مرة ...المهم تعرفت على شاب من اهل الشرقية اسمه جاسم طيب وحبوب ووقت الشدة تلقاه المهم صار جاسم أعز أصدقائي ...وفي يوم جاني جاسم وهو فاك كشرته من الفرحة يعني متشقق وقال لي طلبتك قلت له جاك وش تبي بس


جاسم: زواج أخوي الاسبوع الجاي ولازم تشرفنا طلبتك يا بو سعود


أنا: والله ودي بس يا اخي ما أحب العروس يعني لو تعذرني باكون شاكر لك

جاسم : افا ما هقيتها منك يا بو سعود تكسفني يعني مو قد المقام الله يسامحك


أنا : لا لا وش دعوى الا سيدي وتاج راسي خلاص لعيونك أنت باحضر واذا تبي اساعد ولا فزعة أنا جاهز كم عندي من جاسم

جاسم: تسلم حبيبي كل شي خالص بس الخميس الجاي الزواج في فندق الهوليدي ان في البحرين زين

أنا : افا في البحرين والله يا جاسم مدري وش اقول لك بس قسما بالله قسما بالله الله لا يوفقني أن جوازي في الرياض عند أمي قافلة عليه خايفة أني اروح واختخت للبحرين تعرف هالحريم

جاسم: أبدا لا يمكن واذا على جواز أنا اوديك بنفسي وعلى سيارتي للرياض تاخذ جوازك وترجع ما عندك عذر بعدها ... وبالفعل رحت أنا و جاسم للرياض وخذيت جوازي من أمي بعد ماحلفت لها أني ما اطب البحرين الا يوم العرس وبس وجا يوم الزواج ومن العصر وأنا وعلى جسر الملك فهد لأول مرة وبالفعل دخلت البحرين ومن الفضيحة البحرين وهي البحرين اضيع فيها جلست ساعتين على ما دليت فندق الهوليدي ان المهم وصلت للزواج ودخلت قاعة الاحتفالات وشفت صديقي جاسم وتعشينا المهم يوم طلعت من قاعة الاحتفالات لعب ابليس في راسي وقال متى ثاني مرة بتقدر تطب البحرين خذ لك لفة شوي في المرقص اللي تحت و شوف الناس اللي في الباي باي .,وبالفعل توني ماد دمجتي ( الدمجة = الراس ) الا وأشوف كذا واحد مشبه عليهم من اعضاء هيئة التدريس في الجامعة وواحد اعرفه زين منهم اسمه الدكتور بولس يدرس انجليزي في سنة الاعداد مير مستر بولس كان وقتها مقلع بقوة بهالكاس يتراقص وجنبه البنت الروسية وانا من الروعة شصبت ( شصب = يعني تلوحت صرت زي اللوح ما اتحرك ) وما دريت الا مستر بولس يتراقص ويتحرك في المرقص لين شفته صار قبالي مابيني وبينه الا ربع مليمتر والمصيبة أنه يعرفني زين واني واحد من الطلاب المتفوقين عنده ..بس علشان ظروفه واقلاعه طنش ...المهم يوم خلصت حالة التشصيب اللي كانت عندي واطمر باسرع ما عندي من المرقص ومن الفندق ومن البحرين كلها وطول الطريق اقول في نفسي عسا ما يذكرني بس مستر بولس ويتقعد لي ومرة اقول في نفسي بالعكس بيصير يخاف مني لاني شفته في وضع مشين ..المهم جا يوم السبت ورحت للجامعة وكني ما شفت شي ولا قابلت أحد ..بس صار اللي ماكان على بالي ,, انتشر في الجامعة خبر ان الدكتور مستر بولس طينها يوم الخميس فوق العادة ( طلع بولس يرابط في المراقص ) ويقال ان صور له انتشرت في الجامعة وهو يعرض بكاسه ( يعرض من العرضة والعرضة رقصة نجدية بالسيف ) واسمع الطلاب يوزعون فيما بينهم عنوان موقع منزلة فيه صور مستر بولس وهو معه المخزي ..ووصل الخبر لأدارة الجامعة اللي ما قصرت وتعاملت مع الموضوع بكل صرامة ...ترقية للدكتور بولس ومكافئة شهر وتكذيب للخبر بس هذا ما كان كافي ..تسلط علي مستر بولس لانه يتوقع اني أنا اللي صورته ونشرت صورته وأبي اشوه سمعته ... وبعد ما كنت احسن طالب عنده في الانجليزي رسبني وخسف بي الأرض رحت له في مكتبة وترجيته وقمت أحلف له وأقول سوير ان ماي جود سينس أي سين يو أي فورجيت ايفريثينق بس الرجال ما طاع يصدق بس مو كذا الا شكله علم كل اعضاء هيئة التدريس عني واستقسطوني لانهم يرون أني اتجسس على سرية الدكاترة ..حسبي الله ونعم الوكيل حتى السلم ما سلمت منه,, رسبوني في السلم وبقية مواد الاعداد ولاني رسبت في سنة الأعداد حينئذا قضبوني ملفي وقالوا لي توكل على الله ساعتها الدنيا اسودت في وجهي ..وضاقت بس الوسيعة وين أروح ووش أسوي قدمت على آرامكو قال اقلب وجهك رحت للعسكرية قالوا مش خشمك حتى معهد الآتصالات رفضوني ساعتها صرت أفكر بجدية أني اشتغل بشهادة الثانوي لو سيكورتي بس شغلة والسلام لين أتصل علي ولد عم أبوي واحد ماشاء الله عليه ولد نعمة ومقتدر وسمع بقصتي ونصحني أروح أمريكا وادرس على حساب السفارة السعودية اذا رحت هناك ..هو طبعا يتكلم بسهالة لانه مرسل ولده هناك يدرس هندسة على حسابه بس يقول لي أن زملاء ولده سعوديين جوا يدرسون أول سنة على حسابهم بعدين صاروا على حساب السفارة بشرط يجيبون معدل فوق 4.5 من خمسة ..قمت أحوسبها براسي وادربيها لين اقتنعت وبالفعل قمت الف و احوس في الانترنت لين لقيت عروض جيدة من بعض الجامعات ..لين وصلت للجامعة اللي ابيها وكانت في ولاية ميتشاجن وعندها.
الموضوع الأصلي: مذكراتـ .. جامعي .. ولكن || الكاتب: نجيب العجيب || المصدر: منتديات الأماكن

كلمات البحث

الأماكن , الاماكن , منتديات الأماكن , اسلاميات , صور اسلامية , سياحة , سفر , المرآه , سيارات , فيديوهات اسلامية , برامج , صور , عالم الحيوان , جوالات , اتصالات




l`;vhjJ >> [hlud