منتديات الأماكن - عرض مشاركة واحدة - مذكراتـ .. جامعي .. ولكن

03-07-2006, 09:24 PM

المشاركة 3

نجيب العجيب

عضو عطاءه غير



أنا: لا تكفى وش مسامحني تكفا والله مدري وين أودي جميلك يا طويل العمر ولا على بالك احنا في الرياض بيجي النقيب سعيد وتقول له انا ولد فلان ويحط الغلط كله علي لا يا بابا اصحى احنا هنا في بلد الحرية وعلى فكرة عناد فيك كنت ناوي اتنازل لك بس عناد فيك ما راح اتنازل وباطلب الشرطة وباصير اتلوى ,, وبالفعل جت الشرطة ودتنا للقسم ( صدق قروي في أمريكا واسميه قسم عفوا عفوا اقصد مركز الشرطة) المهم واحنا هناك صادوا أن الولد ماعنده تأمين على سيارته وبيني وبينكم اللي يصيدونه هناك وماعلى سيارته تأمين يا ويله يا سواد ليله ...بس صار اللي مو على البال طلع خوينا الموبايل ودقّ على للأسف دقّ على السفارة السعودية وعلى طول ضغط تحويلة رقم 111 وطلب واحد اسمه أبو عبدالرحمن وقال له التالي : أبو عبدالرحمن كيفك عساك بخير ... والله الوالد يسلم عليك ... لو سمحت يا بو عبدالرحمن صارت لي مشكلة بسيطة سويت حادث بالسيارة وأنا ما سويت لها انشورانس وناشبين لي في مركز الشرطة وماني عارف وش اسوي لهم ايه و بالمرة بعد في واحد بوهته سعودي وحكيه بعد ناشب لي الاعمى مدنق راسه وهو يمشي في البهو الجامعي . وهو يحكي وأنا اكركر بصوت عالي واقول يا حليله أمووت يالسفارة بشويش لا يجيك السفير الحين بالديشارب حقه علشانك وووعععع انطر يا حمار ...وتوني ما كملت كلامي الا و ألقي آلة الفاكس حقت مركز الشرطة تون ون وورقة وش طولها ووش عرضها تطلع ..و يقوم الشرطي يقرا الفاكس ويطلع الفاكس من السفارة السعودية بواشنطن يقولون فيه ان المواطن صاحب السيارة (يعني البزر اللي صدمني ) من رعاياهم وأن السيارة تابعة لهم وأنهم هم اللي استأجروها له و أذا في أي مسئولية فهي بالتالي على السفارة ...وما مرت ربع ساعة الا محامي جاي للمركز مرسلينه السفارة علشان يطلع المحروس وبالفعل طلعوا المحروس في غمضة عين أما أنا فما كنّي سعودي الا والله كنّي ابن ستين كلب ما أحد عبرني لو ما شرطي جزاه الله خير رماني في أسعاف أحد المستشفيات وجلست هناك ساعتين ربطوني بالشاش لين صرت كني مومياء ...ورجعت للجامعة .....بيني وبينكم كل هذا ما ثناني وواصلت دراستي وكنت ولله الحمد ماشي ومتفوق في دراستي ..المهم بعد ست شهور استدعوني في الشئوون الطلابية وقالوا لي أن السفارة السعودية وافقت أني اصير طالب على حسابهم ...بشرط ما ينقص معدلي عن 4.5 من خمسة وقلت موافق وقلت للمسئولة وين قروشي اللي دفعتها لكم أجل ...

قالت لي : خير عسا ما شر وش قروشه يا دلعادي منك لسفارتك تصلحون هم المفروش اللي يرجعونها لك

أنا : قلت طيب ما أرسلوا لي شيك لو بألف دولار اللي يرسلونه للباقين قالت لي هذا بعد مدري عنه اتصل على سفارتك واسئلهم.....وبالفعل اتصلت بالسفارة وكلمت الملحق الثقافي وقالوا لي توكل على الله موضوعك طلع من يدنا رح كلم المسئول عن الشئون المالية و من النذاله سكر السماعة في وجهي ياليته حولني للمسئول عن الشئون المالية الا يبيني اتصل مرة ثانية واتصلت مرة ثانية وطلبت المسئول عن الشئون المالية ..وكلمته وصار ما يلي

المسئول: مرحبا أخوي خير وش بغيت

أنا: هلا لو سمحت يا أخوي أنا اسمي عبدالعزيز وأدرس في احدى الجامعات وارسلت لكم أوراقي علشان أكون على حساب السفارة

المسئول: يا اخوي اخلص بتقص لي قصة حياتك وش عندك

أنا: ياخوي وافقت السفارة أني ادرس على حسابها بس مدري متى بترسلون لي الفلوس اللي دفعتها للجامعة غير المكافئات المالية حقتي

المسئول : هييي على هونك متى وصلتك الموافقة ...وكم لك من سنة

أنا: من اسبوع بس طال عمرك وهذي أول سنة والله يخليك لعين ترجيك

المسئول: اها قلت لي أولا المكافئات المالية اللي لك تبدا بعد شهر من الموافقة ..هذا شي ثانيا الرسوم الدراسية لأول سنة غالبا ما راح نعوضك عنها لأننا ما نعرف شي عن معدلك وهل هو فوق 4,5 ولا لا فأذا نجحت هالسنة انشالله ترسل لنا شهادتك ومعدلك علشان السنة الجاية وبغيت أقول لك شي أول مكافأة لك لازم تجينا في واشنطن تستلمها شخصيا علشان نتأكد أنه أنت مو واحد منتحل شخصيتك وبعدين نرسلها لك على العنوان اللي تبي

أنا: بس طال عمرك يعني الله أعلم بالحال أني ساعات أجرة الباص ما تتوفر لي وأخذها مشي من وين باقطع مشوار من ميتشاجن لواشنطن يعني كنها بين الرياض وجدة مرتين وأنت ادرى الله يسلمك يعني ياليت بمعرفتك أنك من عندك تدبرها وأنت ابوها

المسئول: أقول يا متخلف شغل منفوحة والدوائر الحكومية اللي تخبرها في الرياض أنساه يا شاطر احنا كلمتنا واحدة ما تتغير مهما يكون

أنا: أجل ما تتغير ولا على ناس وناس ...يا طويل العمر طيب من وين أجيب قيمة التذكرة والله ماعندي ومحتاج للفلوس مرة

المسئول: تفهم عربي ولا لا الحكي ضايع معك تشاو .... طوووط طووووط المهم انسدت الدنيا في وجهي لفيت ورحت وجيت ومالقيت الا السنافي جمعة خذيت منه قيمة التذكرة لواشنطن وفوقها خمسين دولا للمعيشة ..والله لا يوريكم رحت لواشنطن وما لقيت لي سكن يضفني الا هوستايل ( الهوستايل غرفة كبيرة فيها حوالي 20 سرير لا تخافون مو سجن بس غالبا للطفارى واللي ما عندهم قروش ) ورحت بنفسي للسفارة وكلي تفائل وابتهاج وانصى الشارع الفخم اللي فيه معظم أهم شخصيات واشنطن و عند الواتر بلدينج اللي عندها السفارة وارقى للدور الخامس اللي فيه الملحقية الثقافية وبعد نص ساعة تفتيش كني في المطار دخلت وسلمت عليهم وكلمت واحد فيهم وتوني أقول انا طالب ويكرشني ويقول وش اسوي لك يعني تبيني أسمع لك قلت له لا طال عمرك بس وين نقدر نستلم الفلوس ...ويقول مو هنا رح السفارة يالله رح هناك ...وبالفعل رحت للسفارة وتوني أكلم السيكورتي ويسئلني اذا عندي موعد قلت له لا قال اجل ما اقدر اخليك تدخل لان اليوم في ضيف كبير طال عمره وأعلا الله من شأنه وممنوع احد يدخل الا اللي عندهم مواعيد وقمت اترجا السيكورتي بلا أبوك يا عقاب السيكورتي من الزنوج الامريكين وخويه السعودي داخل في الرزة يبي يحضر حفل العشا على شرف سموه ورجعت للهوستايل حقي اللي حتى تلفزيون ما فيه وانخمدت من الساعة 8 وثاني يوم الصباح نصيت السفارة وكان سموه الله يسلمه راقد ودخلت السفارة ومن دباشتي جايب تقرير من جامعتي أن معدلي فوق 4.7 وكل أوراقي وجوازي وكل شي ...وانصى المسئول اللي كلمته على التليفون ...ووريت أوراقي ويقوم يناظر أوراقي ويتمقل في شهادة معدلي ثم يرميها على الأرض ويقول لي وش أنا قايل لك بالتليفون بعد سنة وش يضمن لنا يمكن تسقط أما فلوسك حقت هالشهر فهذا شيكك و بلا كثرة حكي ويطلع الشيك 800 دولار قلت له بس 800 دولار ويضحكون اللي في المكتب ويقولون لا طال عمرك المليون في الطريق بس اصبر شوي... احمد ربك بس و انثبر واترك عنوانك اللي تبي نرسله لك عليه ..وبالفعل خذيت الشيك و كلت تبن ..ورجعت لديرتي وسددت لجمعة السلف حقه وبديت اعرف طعم الحياة لين جا الشهر الثاني وموعد وصول الشيك حان بس مافي شي ...واتصل على السفارة آآآه يا قلبي تبون تعرفون وش صار يوم كلمت السفارة وسئلتهم عن الشيك.

أنا: طال عمركم لي شيك المفروض انه يوصل أول الشهر واليوم 7 من الشهر ولا وصلني شي

الموظف: لحظة اشيك اعرف من احولك له صراحة مدري من المفروض تراجعه في هالسالفة

أنا : طيب طال عمرك ..وفاصل موسيقي لمدة نص ساعة انتظار وبعدين يطلع لي موظف ثاني

المسئول : هلا أخوي وش مشكلتك

أنا: هلا طال عمرك أنا طالب على حساب السفارة وموعد شيكي حان من اسبوع ولا بعد وصل شيكي الى الآن

المسئول: لاحوول هالسنترال أثول وش دخلني أنا هنا المكتب الخاص بالملحق العسكري لحظة شوي ولا كلم مرة ثانية يالله تشاو ...طووط طووط ...وأدق مرة ثانية على السفارة وفي المحاولة الأخرى حولوني الى المسئول الصدقي عن شيكات المبعتثين ويكلمني

المسئول: هلا أخوي وش مشكلتك

أنا : والله طال عمرك شيكي حان وقته من أسبوع بس ما وصل الى الان يا ترى يا هل ترى ماهو السبب

المسئول كتبت عنوانك كويس ومتأكد منه ولا زي بقية عريبيا اللي هنا مايعرفون يكتبون زي الناس

أنا: لا والله كتبته صح حتى الحساب في البنك حطيته ما بقيت شي,, الا طال عمرك أنتم مرسلينه عن طريق الدي اتش ال ولا الفيديكس علشان اتابع الطرد معهم

المسئول: والله متفائل أنت ووجهك مابقى الا كل شيك نرسله عن طريق الدي اتش ال كان ميزانية السفارة ما راح تكفي أما عن نرسل الشيك للبنك فمش خشمك بقوة ما صرنا نشتغل عند أبوك وانثبر واقضب أرضك لين يوصلك الشيك واذا مر شهر ولا وصلك الشيك فأكتب خطاب للسفارة وتعال بنفسك وسلمه لنا علشان نصدر لك شيك ثاني بدل فاقد وكلمة ثانية مابي أذا فهمت بركة وأذا ما فهمت في الطقاق ...طووط طووط وبالفعل انثبرت في محلي لين وصلني الشيك يوم اربعطعش في الشهر ومشيت الحال وكملت السنة على هالوضع وأبشركم ما أرسلوا لي التذاكر بس لقيت سعودي ابن حلال تعرفت عليه في أحد المطاعم جاي مع أبوه للعلاج ويوم توفى أبوه عطاني تذكرته أرجع بها لآهلي في الصيف ..المهم قبل ما أسافر أرسلت تقريري للسفارة وفيه معدلي اللي كان 4.8 من خمسة وكنت وقتها الثاني على الكلية ...وجلست في الرياض شهر ونص ..ورجعت لأمريكا قبل الدراسة باسبوعين علشان أشوف وش سوت لي السفارة ...بس للأسف لا حياة لمن تنادي ..وعلشان ما أطول عليكم يوم اتصلت على السفارة قالوا لي أن معاملتي وافقوا عليها وبيرسلونها لوزارة التعليم العالي في الرياض مرفقة بمعدلي الجامعي ثم اذا وافقت وزارة التعليم العالي بيرسلونها من جديد لواشنطن وبعدين ترسلها السفارة لوزارة الخارجية لاعتمادها وهي مرفقة بمعدلي الجامعي وموافقة وزارة التعليم العالي ...ثم اذا وافقت وزارة الخارجية بيرسلونها مرة أخرى الى واشنطن وبعدين ترسلها السفارة الى وزارة المالية مرفقه بمعدلي الجامعي وموافقة وزارة التعليم العالي وموافقة وزارة الخارجية واذا وافقت وزارة المالية راح ترسلها الى واشنطن ومعها اعتماد مالي بتكاليف الدراسة ..البلاا عقب اللفة الطويلة هالحكي كله عن تكاليف السنة الدراسية الثانية أما السنة الماضية فيبيلها نفس أطول لانها لازم تلف نفس ذيك اللفة بس زيادة على ذاك تروح لقسم المستحقات المالية ومراجعة الأرشيف وبعدين تمر على قسم المستحقات اللتي لاحظوا التي وحطوا تحتها الف خط اللتي انتهت فترتها ولم يقم مستحقوها بصرف مستحقاتهم ...اللي داخ يروح يجيب بنادول وياخذ حبة قبل ما نكمل ......المهم جلست انتظر لين ترسل السفارة المصاريف لكليتي علشان اقدر ادرس ..الله وكيلكم جلست شهرين ونصف وأنا كل يوم عند الشئون الطلابية اخذ لي دش تهزيء ومتى بتدفع المصاريف وافهمهم ان السفارة بتدفع التكاليف بس المسالة بتاخذ وقت و مسئولة الشئون الطلابية في الجامعة حكت عربي من كثر ما شاب راسها منّي وكثر ما تسألني متى السفارة بتدفع التكاليف واخر شي طقتها في وجهي لي مهلة اسبوع اذا ما اندفعت المصاريف راح يطردوني ...ساعتها تسلفت فلوس من صديقي جمعة وطمرت لواشنطن ...واللي خذيته منهم ان المعاملة توها ما خلصت وهم مستعجلينها بس التأخير جاي من الرياض وما بيدهم شي ..ترجييتهم لو الفين دولار ولا خطاب رسمي للجامعة يبلغونهم فيه كل التفاصيل علشان اسكت بها الجامعة مير ما عندك أحد ..وأهلي على قدهم ولا بيدهم شي ولو باعوا عفش البيت التحويل من الرياض لأمريكا على الأقل بياخذ اسبوع ...ساعتها رجعت الى ميتشاجن وفي نيتي اجمع أغراضي وعفشي وارجع لديرتي اصرف واشتغل سيكورتي بشهادة الثانوي الى أن حصلت المعجزة ....

استدعتني مسئولة الشئون الطلابية في الجامعة واتصلت علي كذا مرة بس أنا اطنش بيني وبينكم مالي وجه اقابلها دامي مطرود مطرود أنطرد سكاتي بس دون فشيلة ...بس هي كلمة غانم صديقي وقالت له لازم أنا أقابلها ضروري ولا اشيل هم التكاليف ...وتو غانم يوصل كلامها لي الا أطير من الفرحة واقوم أحبحب في الجواز الأخضر وأغني سارعي للمجد والعلياء ...وأقول والله سفارتنا على غثاثتها الا أنهم ما يقصرون مع عيالهم ...واطمر لمقابلة مسئولة الشئون الطلابية واسمها راشيل

أنا: هاي راشيل تيل مي دو يو ريسيف ذا موني فروم اور امباسي هاه وين ذات هبند

راشيل: نو ابدول ازيز ذا ينويفرسيتي كونسلت ديسايد تو جيف يو فري ميشون تو فينيش يور ستدي هير اند بوست جرادويت ستدي اون اس مور ثان ذات يو ويل رسيف900 دولار فروم اس ايفري مونث بت يو هاف تو جيت مور ثان 4.5 ايفري يير .......

وللأسف يا سادة مثل ما شفتم هذي نهايتي .ديرتي تخلت عني والغرب احتضنوني مجلس أدارة الجامعة قرر يوهبني بعثة دراسية مجانية على حساب الجامعة الى ان أتم دراستي الجامعية وفوق هذا كله دراساتي العليا وبيعطوني مكافأة شهرية 900 دولار ....وبعد ما تخرجت وكنت الأول على الجامعة لقيت مندوب من السفارة السعودية ومعه خوي له من واس (وكالة الأنباء السعودية ) يصوروني علشان ينشرون صوري في الجرايد السعودية وما قصرت السفارة في الأخير اهدوا لي درع تذكاري بزعمهم أني بيضت وجه السعودية في الخارج ..المشكلة أنهم نسوا أني بيضت وجه الجامعة الأمريكية ومجلس ادارتها اللي عطوني الثقة ولولا الله ثم هم كان أنا سيكورتي الان في الرياض في احدى المجمعات التجارية ...هذي يا سادة يا كرام بعض ما يعانية الشباب السعودي والخليجي اللي يروحون للخارج ويدرسون على حسابهم ..واللي كثير منهم مالقى الفرص اللي يحلم فيها في ارضه بس المؤلم ان البحث عن فرص أفضل أصبح ممنوعا على العامة و حكر على الخاصة ...

في النهاية أقول أرجو الا تغضب هذه الصفحة أية شخص أو جهة لانها في البداية والنهاية قصة خيالية و ليست موجهة الى شخص بعينه او جهة بعينها انما هي سرد لمواجع كثير من اشقائنا في الخارج اللذين يسعون للحصول على اعلى الشهادات العلمية بهدف أفادة بلادهم من خبراتهم ودراساتهم متحملين بذالك عناء السفر والغربة .......

هذه القصة بما فيها من واقع وخيال ... تعود لواحد من الناس