ياهيه التفت لي واسمع ادعاي لك ياهيه=ترى عادك بتشبع من البعد وتواجه
دعيتك بصوت ٍ ياصلك ليه ماتوحيه=وانا اسمع ضلوعك من صدى الصوت لجّاجه
عليك الفؤاد اخلاجه مصمّخ ٍ راعيه=خف الله في راعيه ماتسمع اخلاجه
ترى العفو قد جاك اوله واغتنم تاليه=وترى الحلم بحر ٍ غير لا تامن امواجه
وترى الود ليل ٍ مظلم ٍ جيت لك ساريه=سراجه وصالك والجفى ينفخ اسراجه
وترى قصرنا اللي كم سنه نجمع ونبنيه=هوى العذل طيّح بابه العود وسياجه
((لي ايام مدري وين دارك ولاادري ليه=وانا خابر اني باب شفّك ومزلاجه))
غياب ٍ بلا سبّه هجاد ٍ بلا تنبيه=وجفا أغلى العرب نار ٍ على الكبد وهّاجه
نضج قلبي من البعد وش حاجتك تكويه=جفاك الجمر والصبر في بعدك الصاجه
طبع حبك بقلبي والايام ما تمحيه=هذا هجرك يحاول يموجه ولا ماجه
يموت الأمل لكن ظنون الغلا تحييه=وعروق الوفاء فالروح والقلب وجّاجه
خبرتوا حد ٍ يبكي على واحد ٍ يبكيه=وخبرتوا حد ٍ مسجون مايبغي افراجه
احبه ولا ابغضته على شيٍ يسويه=ولا زالت ارقاب الرجاء فيه منعاجه
عسى منزل ٍ ضمّه حقوق الوسم تسقيه=وتضحك له الدنيا وهو يضحك احجاجه
فقد خاطري شي ٍ من الضيقه مسلّيه=وغدت روحي من الناس والليل هجّاجه
((اروح لمكان ٍ خابره خابره ياتيه=اسوق القدم صوبه وهي مالها حاجه))
مكان ٍ نزيه ٍ وأول مواجهي له فيه=وانا خابر ٍ مارجل مثله بدواجه
((لعل وعسى ما حدني للمجي يدعيه=واشوفه وانا ماودي اسبب احراجه))
((يحب الجريح آخر دروب اللقاء ويجيه=وتحب القدم جيّة مكان اول مواجه))

الموضوع الأصلي: لي ايام مدري وين دارك ولاادري ليه || الكاتب: بندر نجد || المصدر: منتديات الأماكن

المصدر: منتديات الأماكن