ديوان الشاعر هادي بن دلهم الهاجري

ads
دليل المواقع السعودية	انشأ رابط لصفحاتك	اعلانات المبوبة	نشر بلس	اختصار واتساب

05-05-2009, 11:12 PM

المشاركة 5

عذبة الأطبآع

عضو ياهلا فيه



مـقـآطـع فــيـديو لشـآعــرنـآ ..

ثـآلثـآ :

مـقـآطـع الفيديو

فيديو مجاراة الفراعنه

- هادي الهاجري و ناصر الفراعنة

قـصـيدة يبدع القيفان ( نجم القصيد ) ..

- الشاعر هادي الهاجري يـبـدع الـقـيـفـان

بـني هـآجر ( نـجم القـصيد )

- هادي الهاجري - بـني هـآجر

مـسـآبـقة الليوآن ..

- هادي الهاجري - الليوآن

شـلة يازين وش جاك ..

في جـآمـعـة العـلوم التـطبيـقـيـة في الأردن ..

- هادي الهاجري- يـآزيــن وش جـآك

قـصيدة فمان الله ..

- هادي الهاجري - فمـآن الله

شـلة تحملت ماجاني ..

- هـآدي الهاجري - تحملت مـآجـآني

اخي العزيز / اختي العزيزة .. الرجاء وضع توقيع واحد فقط وبحجم مناسب !! كما نرجوا منكم عدم وضع توقيع صوتي يظهر تلقائي اثناء فتح الصحفه .

06-05-2009, 01:11 PM

المشاركة 6

عذبة الأطبآع

عضو ياهلا فيه



قـصـآئد شـآعرنـآ الصـوتيه + الكتـآبـيـه

رآبـعـآ :

القـصآئد الصـوتيه والكتـآبـيـه

الا يالهموم

الآ يالهموم - هـآدي الهـآجري((للإستمـآع))mp3 - 3.85MB

الا يالهموم اللي تجي القلب روحي بعيد
ولا تسهرين عيون هادي على غالي

***

إلى جيت أخفف ضيقة الصدر والتنهيد
تذكرت خلي ثم جريت موالي

***

ابو لبةً كنها القمر في ليالي العـيد
عيد الضحيه من بعد شهر شوالي

***

وعينه مثل عـين الوحش لا درع بالصيد
وعنـقه مثل عنق الفرس فيد خيالي

***

جماله يزعـل مترفات الصبا والغـيد
إلى مـن ذكرته زاد همي وغـربالي

***

حسين الوصايف دونها جرهدي البيد
حدتني ظروفي ياعسى الوقت يصفالي

***

بعيده عن اللي ناويً بالردى وبعـيد
بعيده عن الهسات ودروب لـنذالي

***

عسى الله يزينها وأفارق هل التنكيد
وأغني طرب وأرفع بصوتي وموالي

***

والا يالهموم اللي تجي القلب روحي بعيد
ولا تسهرين عيون هادي علـى غالي

06-05-2009, 01:16 PM

المشاركة 7

عذبة الأطبآع

عضو ياهلا فيه



الــــشــــوقـ ..

الــــشــــوقـ ..

[rainbow]الــــشــــوقـ - هـآدي الهـآجري ((للإستمــآع))mp3 - 2.67MB[/rainbow]

يا مرحباً والـشـوق في خافـقي ساق
نياق شـوقـي دقها و الجليله

***

مثل الـبدو لا هاضهـم نوض براق
شـدو على الوجهه يبون المسيله

***

وأنا تبعت الشوق يازين مشـتاق
ألاحي الورقه بـراس الطـويله

***

حبك فوسط القلب له عـرق دفاق
يصب في وسط المعالـيق سيله

***

لكن أمانه لا تطري لنا فراق
والحب للعاذل بـلاش تحكيله

***

ترى الفراق يحتنا حت الأوراق
لا تحسب إن فراقنا له ذبيله

***

وأنا على جيك يا مزيون تواق
يالله عسى دارك حقوق المخيله

***

وياتونك البدوان نجاع بنياق
يبغون مرباع بذيك الخميله

***

الربل فيها غادين نبته أرناق
يعلها الهمال صبحٍ وليله

***

وأجي قريب منك وأقدم سياق
معديه ومصيحه والطويله

***

لا شك خل العهد من بيننا باق
فنجال بن زقوته طعم هيله

06-05-2009, 01:21 PM

المشاركة 8

عذبة الأطبآع

عضو ياهلا فيه



قــطــعـة الهـآس

قــطــعـة الهـاس

قــطــعـة الهـآس - هـآدي الهـآجري ((للإستمـآع)) mp3 - 5.48MB

ياللي تعاتبني على قطعة الهاس
لا تلومني مداهمتني هواجيس

***

حطيت أنا البندق على كور مقواس
وعلقتها على غزال النسانيس

***

أرمي بها الشرّد ولا أرد بفلاس
يوم إن بعض الناس ردوا مفاليس

***

أنقا جديد القول ما جبت درّاس
في وصف خلي همت مثل امرؤ القيس

***

نكست له قيفان شعري تنكّاس
تنكيس فرخٍ علمته القرانيس

***

إمشي قدم كل الملا وإرفعي الراس
يا بنت من عدّا طوال المراويس

***

يا أم العيون اللي كما عيون قرناس
يكفخ وسبقه فالأصابع محابيس

***

سودٍ هدب عينه كحالٍ ونعّاس
كن الهدب صفة رماح السناعيس

***

والعنق .. عنق اللي تقدم بلا فراس
مهره صعب ما طوِّعِتْ تحت فرّيس

***

حوريةٍ في الأرض تمشي مع الناس
جمالها رجّح جميع المقاييس

***

وشعرٍ إلى من فلته قلت غطاس
تحت الردايف طاح من غير تمليس

***

إن شفت ردفس قلت لا هان ربّاس
ولا هان بيتٍ في ربوعه مربيس

***

وهادي إلى منه توحاس لبّاس
لبيس من قاصي المعاليق لبّيس

***

يا لعنبو منهو مع الوقت ينساس
في ذمتي ذمه فلاني بناسيس

***

أهل دمعي كل ما حل ذكراس
ويفز قلبي كل ما حل طاريس

***

هذا بعض وصفس كتبته بكرّاس
صعبٍ جمالس ينحصى بالقراطيس

***

محدٍٍ على الميدان قال أتحداس
أنتي على الميدان يصعب تحديس

***

شوفي عروق القلب يا بنت يبّاس
أروي ضما شوقي مثل ماني أسقيس

***

لكن .. عسى من يلبس الجنز يفداس
ياللي على شانس لعبت المناكيس

***

لس لبةٍ بيضه زهت عقد وألماس
مثل البدر ماهي بنور الفوانيس

***

وبطلب من الوالي عسى الله يرعاس
وإنه من عيون الحساسيد يحميس

06-05-2009, 01:22 PM

المشاركة 9

عذبة الأطبآع

عضو ياهلا فيه



إنكسـآر الضــوء ..

انكسار الضوء

إنكسـآر الضــوء-هادي الهاجري ((للإستمـآع))mp3 - 3.60MB

شفت انكسار الضوء في داخل الماء ؟!
هذا إنكساري لك بعد عني أقفيت

***

يعني الهجر يكسر كيانـي وأنا لاء
بصبر ولو يا شوق روحي تغليت

***

صدق المحبه يا إبن الأجود عمياء
ياليت قبل تروح فكرت ياليت

***

هذا قرارك من ألف كان للياء
أخذت ماتبغي بعدها وصديت

***

عرضت لي حبك على أشكال وأزياء
حطيت روحك ميتٍ فيّ يابلفيت

***

منيتني بأشياء وأشياء وأشياء
وإنته ولا من ذي الأشياء سويت

***

لو يدرسون الحب في علم الأحياء
إن يدرسون الحب عني وأنا ميت

***

وإن الولد هـذا إذا حل طرياء
حبيبته يزيد فيه التناهيت

***

لولا التماني مابقـى ناسٍ أحياء
ولا رجوا فقرانا والي البيت

***

شفت انكسار الضوء في داخل الماء ؟!
هذا إنكساري لك بعد عني أقفيـت

06-05-2009, 01:25 PM

المشاركة 10

عذبة الأطبآع

عضو ياهلا فيه



بني هـآجر ..

بني هاجر

بني هـآجر- هـآدي الهـآجري (( للإستمآع ))mp3 - 7.03MB

الآ ياهاجسي هات الجزايل
وأنا اعرفك بعيد امن الهزايل

***

بدايتها بذكر الله ربي
رقيبً فوق عباده يخايل

***

ومن بعد الولي جبت القصيده
بمدح اللي يذبـون الطوايل

***

بني عمي بني هاجر حزامي
ينـومسني فعلهم بالمـثايل

***

وهـذي نبذةً عنهم ومعها
دلايل يامدورة الدلايل

***

فحنا ذخر من ضامه زمانه
جـبالً لا رتـكـينا مـانتهايل

***

نزبن من نصانا نحتمي له
ولو جموعنا شويً قلايل

***

مثل يومه زبنا ابن حجرف
وندبنا مناديب ورسايل

***

ومدحنا اللي مدحنا مانسانا
عـساها معنزه يوم الهوايل

***

وهو راكان حماي الدبيله
إبن حثلين للطولات طايل

***

وغيره يوم مرسول قحطاني
وقف شافي وقص الها الشلايل

***

تحركنا لهم من فـوق هجنً
وخيلً صفر من خيرة لصايل

***

وردنا فـوق جردات السبايا
وردنا تين والعالم تخايل

***

ندوس الموت بقلوبً جريه
وردنا الموت يباس الـبلايل

***

وحنا اميرنا الـمعروف شافي
هذاك اللي على الطالات نايل

***

إلي منه أمر سمعً وطاعه
وقـفـنا واحتمينا لدبايل

***

وإلي منا على الموت انتحينا
لكـن جموعـنا قـنف المخايل

***

مسمينً بخلان الأشده
عراميس الهجن منا نحايل

***

وحن خزنة ظفر قد قيل عنا
إلي من ولعت روس الفتايل

***

ملقبنا بها ليث الجزيره
ولاهـو قـول حي الله قايل

***

أبوتركي معزي اللي حكمها
وهي سلبً ونهبً بالهوايل

***

وكـلً رد سيفه في غماده
وطاعوا له مقاويد الحمايل

***

قحاطينً عرفـنا بالشهامه
عبيده لابتي والشك زايل

***

هواجر مانمن إلى عطينا
نحذي من طمعـنا كل فايل

***

وترى للضيف مقدار أومعزه
كرامة ضيفـنا فالشح حايل

***

نقـدر جارنا ونعز عاني
ونارد في نهارً به قـتايل

***

ومنا اللي عفا من ورع جاره
وخلاها من بساط الـوسايل

***

وهي ياكبرها في صدر غيره
لكن الطيب يكسب بالفعايل

***

وقال ارجع لبيتك وانت جاري
وحنا اللي مزايانا فـضايل

***

وحنا ماضيً منا وفـيـنا
حليف الطيب كساب الجمايل

***

تعنت له عـجوزً من رحيـمه
بلاها بليس بأ شد العضايل

***

وجاته واحذفت بالستر عنده
وقالت مالها غـيرك محايل

***

ترى باكر قصاصه علموني
ومن يفرحس ياقـلـوبً غـلايل

***

ترى مال الحمول الآ جملها
هديب الـشام شيال الثقايل

***

وكم بعد بفعال القبيله
قصير الهرج يكفي كل طايل

***

وياكم كم من فـعل الهواجر
عجزت احصيه في بيض السجايل

***

وكـلً فـيه حقه من علومه
بدون قصور فـي كل القبايل

***

وختمان القـصيده سامحوني
صلاة الله عدد وبل المخايل

06-05-2009, 01:26 PM

المشاركة 11

عذبة الأطبآع

عضو ياهلا فيه



تحملت مـآ جـآني ..

تحملت ماجاني ..

تحملت مـآ جـآني-هـآدي الهـآجري ((للإستمـآع))mp3 - 8.55MB

تحملت ما جاني من الشامت العذال
ولكن عليك الله لا تطول بهجرك

***

أنا والله إني فيك ما أطاوع الأنذال
وتراني يا نور العين باقي على خبرك

***

لجل خاطرك بصبر وأطول عليك البال
وأنا كل يوم يمر من عمري وعمرك

***

عذول يفرق بيننا جعله السلال
لو إنه إلى أشرك فرق إثنين كان أشرك

***

و إلى من سألـك العاذل وقال .. وشهو قال ؟
قله طلبت عيونه وقال لي بصرك

***

تنفذ علي أوامرك دقها وأجـلال
وأنا أقـول لك تـقدير لبيه تحت أمرك

***

توردني عدود الجفا ما معي حبال
عـسى منت ناوي فراق يا ربنا سترك

***

علي دايما تخطي تمشي على المنوال
و أوقف بصفك و أنصرك وأفخر بنصرك

***

تغيرت جـل الواحد مغيـر الأحوال
ولا باقي إلا صـورةٍ عطرها عطرك

***

أنا طالبك لا شفت رقمي على الجوال
أمانه ترد الصوت يا زين كبر أجرك

***

أنا أذوب في كلمة ألو .. سم .. كيف الحال
وأنا أقـول يا قلبي على فعلته صبرك

***

شربت الشقى من دلة الشوق بالفنجال
دلال الوله يا زين فاحت على جمرك

***

ترى ديار حبك بالحشى صابهن إمحال
دليل على هذا شفه يابسٍ سمرك

***

ترى ذود شوقي صابهن من وطنك إجفـال
بعد كان مرتع روض خلفاتهن قدرك

***

وهي كان تارد نبع حبك سنن وأنهال
وأقهويك حبي والغلآ تـقدعه تمرك

***

تقول العواذل روح يكشف عليك الفال
ترى الحب يذبح خص لآجا على كبرك

***

ويِقرا عليك الحمد والتين والأنفال
حشى ما خبرنا في البشر منـسحر كثرك

***

رحت الطبيب وقلت له شف وش بالحال
قال إفتح زرارك أبكشف على صدرك

***

تلاحق من اللي باقيٍ فيك يا رجال
ترى إكور دم البيض تطغى بها حمرك

***

أنا ما ذبحني فيك يا زين كود خصال
مع جسمك المياس شعرٍ إلى خصرك

***

كما غصن موز لا لفحه الهوى ميال
حشى كن مالك يالغلا عظم في ظهرك

***

أنا قبل لا أعرفـك عندي المعنويه عال
وذا الحين شفني طايحٍ شنج مستدرك

***

سقى دار خلي مزنةٍ صادقات خيال
أنا طالبك يارب تامر بها بامرك

***

تنزل عليها من حقوق الوسم همال
أنا طالبك يارب يسرك ولا عسرك

***

تشوف الـدناكـر ورّدوهن أهلها هجال
ومن عشبها تشبع بها الهامل وتبرك

***

وأنا طالبك لا شفـت رقمي على الجوال
أمانه إترد الصوت يا زين كبر أجرك

06-05-2009, 01:28 PM

المشاركة 12

عذبة الأطبآع

عضو ياهلا فيه



البدآوه ..

البداوه

البدآوه-هـآدي الهـآجري ((للإستمـآع)).mp3 - 9.54MB

الحمدلله واحدن نطلب رضاه
اللي رزقنا بالحيا عقب المحال

***

والحمدلله حق لي ما أتمناه
أجازة اللي جات من ذرب الأفعال

***

من قايدٍ لامن ومر الأمر طعناه
نوقف وهو يوقف لنا في وضلال

***

وياطاري الأسياد ما عاد يمحاه
إلا مع البدوان شدٍ ومنزال

***

والبارحه في الليل صارت معاياه
مزوح من بين النشاما وسعة بال

***

والكل منهم جاب رايه وملواه
وأمسوا على رايٍ شديدٍ وحوال

***

واصبح دبشهم كن الاطماع تشعاه
حم الذرى تزمي مع جرد الإسهال

***

جيت الفحل وأطلقت قيده وسقناه
عزمت بالمنجاع ما أطيع عذال

***

بسج مع ذودٍ من العرب منقاه
في خايعٍ مافيه كشات نزال

***

ما حل به راع الغنم راعي الشاه
ولا حط له في طارف الروض مخيال

***

صوت أم سالم يبري العله غناه
لا جرت الموال جريت موال

***

وشوف القعد والسيل لا قام يفراه
ثم صارن بطون القعد كلها هجال

***

هوى فوادي شدة البدو ومناه
وأسوق خلفاتٍ ويبرالي أجهال

***

وإلى رفعت الصوت قامت توحاه
تلتم لا سمعن من الصوت غرمال

***

ولا صار في الزرج القعوده فمحلاه
هي لوله فقفاه وان صار فقبال

***

هي الأوله ماهيب تاتيك فتلاه
وكنها على الأول تنادى وتنهال

***

سودٍ لها وصفٍ فريد بحلاياه
وتشوق راعي الصنف ويفز بذهال

***

سيف اللحي طافح ولذاني انباه
ومال المعذرب فالعذاريب مدخال

***

وبراجم كتوفٍ بلبدٍ مغطاه
دارت سنتها ولبدها فوقها حال

***

كن سيرها مع سوم هيال ترقاه
سندٍ من الغارب مواطيها ثقال

***

وجمبٍ وسيع وجل عظمٍ ومثناه
وكنها لشل الخف ماهيب تحتال

***

ومعهن ولد نيلان يازين ممشاه
متنيوطٍ كنه يتخطراله حبال

***

كنه يمتـّر الأرض لا سار بخطاه
راعي النظر يشتاق ويفز فالحال

***

غافل وكنه جافلٍ في مزاياه
كنه يتهايق من ورا طوال الأمثال

***

أسود جليلٍ جل عظمه وموطاه
وراسه كبير وشاربه كنه طربال

***

والإذنين مثل الشلف كنهن مسواه
متلاقياتٍ فوق هامته وطوال

***

ياراعي البل كان تبغي المباراه
هذا الفحل وإن قلت ما قيل دجال

***

وأبرالهن من فوق جيبٍ شريناه
امن الوكاله كاش ما يوخذ مهال

***

وعساسنا روّح يدور معشاه
مذكور له جون يبي فيه منزال

***

وأصله وداج بداني الروض وأقصاه
عود عجل متغانم الطرش ما عال

***

منزله في دمث الزباره تراواه
وحسب لمجرى جاري السيل لا سال

***

وعشوا بروضٍ كن زاهر خزاماه
زهور وردٍ في مشاريع مدهال

***

وذِبح الخروف وجيب للشايب شواه
جابه صبيٍ للمواجيب فعال

***

ويقول له لبيه لا منه حاكاه
أفديك أنا يا أبوي بالحال والمال

***

ودلال رسلانٍ على النار مركاه
والعود لزرق في المعاميل يجتال

***

والنار تشعم والنجر لج بعواه
وقدم لأبوه من أول الكيف فنجال

***

ولا أذن موذنهم توضى ولباه
صلاته مبداه من بد الأعمال

***

وصوت بصوته في جهاز المناداه
قال إقلطولي ياكريمين الأسبال

***

جاوه .. ورحب .. والكبير يتلقاه
هو المقدم في جميعات الأحوال

***

حلب لهم أم العظام المساواه
كبيرة الجمهاه ضافيت الأسبال

***

لين القدح نثر من أطرافه إرغاه
و ساقه عليهم حي ذا الفال من فال

***

قلط عشاه وكل شيٍ تشواه
جعله بعد خوة رديين الأنذال

***

والصبح قاموا والدبش فيه إمفلاه
قالوا هذا المرباع مابه تعجال

***

هذا هواي ومغبط اللي بمثواه
ولاني بغابط راعي المال بالمال

***

اللي بقصره قاعدٍ ماتعداه
ماشاف طربات البدو وقت الإشمال

***

قضت حياته بين بيعته وشراه
وإليا خسر ريال يكسب له ريال

***

مسكين .. حاله راح كله بمأساه
صابه من الحسبات في الأسهم هبال

***

وختآمها في تالي القاف مبداه
الحمد للي غاثنا عقب الإمحال

06-05-2009, 01:30 PM

المشاركة 13

عذبة الأطبآع

عضو ياهلا فيه



يـآ أبو فـهد

يا أبو فهد

يـآ أبــو فــهــد-هــآدي الهـآجري ((للإستمـآع))mp3 - 3.12MB

يا أبو فهد شفت الذي تنعش الروح
دلوعةٍ تشفي جميع الجراحي

***

تمشي معي يا بوفهد وين ما أروح
من عقبها مجنون مانيب صاحي

***

أنا أشهد إني من هـوى الـزيـن مـذبـوح
شفـني من البارح وهذا مطاحي

***

شكـله فـريد وكمل الـزين مملوح
وجهه مثل نور البدر يوم زاحي

***

زاح الظلام اللي على النحر مطروح
أبـو جبينٍ كنه البرق لاحي

***

يا سعيد ألاحي ورق عمّـان بالـنوح
من سبته كني صويب الرماحي

***

وتفوح كبدي من لظى حبها فوح
فوح البريق اللي على النار فاحي

***

يا أبو فهد بزهمك تكفى نبي نروح
أما سرينا ألحين وألا الصباحي

***

شفني وأنا مبعد عنه فيني جروح
يسكن قطر من دون دار الفلاحي

***

فالجامعه مثل الوحش صرت مطروح
ماني مثل عامه وأفل الجناحي

***

يا أبو فـهد شفت الذي تنعش الروح
دلوعـةٍ تشفـي جميع الجراحي

***

تمشي معي يا بوفهد وين ما أروح
من عقبها مجنون مـانيب صاحي

06-05-2009, 01:31 PM

المشاركة 14

عذبة الأطبآع

عضو ياهلا فيه



فـمــآن الله ..

فمان الله ...

فمــآن الله-هـآدي الهـآجـري ((للإستمـآع))mp3 - 3.59MB

فمان الله يا حبٍ تمركز بالضلوع العوج
وفمان الله يا وجهٍ عرفني حزة الحاجه

***

مـراح المركب اللي يدفـعه صلف الهـوا والموج
على سطـح البحر شـاء القدر وأقفت به أمواجه

***

أنا مانيب لا غاوي ولا ضايع ولا مرجوج
أنا لو أجرحه جرحٍ صعيب ياجد علاجه

***

على وضح اللقـا بـسد رجلي والدروب فـجوج
وأنا ادري يوم قفيت أصبحت هامتك منعاجه

***

تحملت الصبر وأودعت سـرك بـالضمير دروج
وأقفلها بمفتاح صعيب فتحة زلاجه

***

أنا ياما سهرت الليل صاحي والعباد سجوج
ألا يا ليت لي نفـسٍ مع ذا الناس سجاجه

***

ألا يا أبو الثمان الوضح بيـضٍ كنهن ثلـوج
متى تحكم على قـلبٍ سجينٍ يـبـغي فراجه

***

ترى حبك وسط صدري مشيد يا غلآه بروج
إلى منه فقد زولك يهدم عـالي أبراجه

***

تدور زبدة المنتوج .. هذي زبدة المنتوج
تكلم في قفاي .. فيك أنا ما طعت هرّاجه

***

فمان الله يا حبٍ تمركز بالضلوع العوج
وفمان الله يا وجهٍ عرفني حزة الحاجه

06-05-2009, 01:32 PM

المشاركة 15

عذبة الأطبآع

عضو ياهلا فيه



عــينه مـآكـله نـص خـدهـ ..

عينه ماكله نص خده

عــينه مـآكـله نـص خـدهـ - هـآدي الهـآجري ((للإستمـآع))mp3 - 5.03MB

لو قـالوا إن العـين تاكل من الخد
لا أقول عينه ماكله نص خده

***

عينه مثل عين أشقرٍ حقـق وهـد
حقـق قـبل لا يطير وأكد مهده

***

أذوب في نظرات عينه إلى لد
وأرخا هدب عينه للآخر ورده

***

وشعرٍ مثل ذيل الفرس لامنه كد
لا فلته عند المعاقيل حده

***

والخشم سلة سيف لا نـاظرت حد
ومبيسم حبة طعامه تسده

***

مالي غنى عنه ولا لي عنه بد
وإن زعل خلي قلت يالله رده

***

شوف الحديد بلاه بالصيف يمتد
وبرد الشتا للوضع الأول يرده

***

هذا مثل قلبي إذا شـافك يرد
وإن رحت عني لاهب الشوق مده

***

أحتد له بالشوق ويحدني حد
وأتحمل عتابه وناره وبرده

***

مثل البحر والسيف بالجزر والمد
والشوق يذبح بين جزره ومده

***

أشفق على شوفه وأسير أتنشد
نشدة يتيم عن الأبو سال جده

***

وأشتاق له ياناس والشوق من جد
من صادق الوجدان شوق أستمده

***

يفداه شوقي والأحـاسيس والود
ويفـداه قلـبٍ ما يخون الموده

***

أول لقـانا فالرويل داخل السد
مثله لقلبي ما أخبر شخص شده

***

أرجوك تكفى لا تبيح بي السد
أشتاق لك ما بين مده ومده

***

ولا شفت رقمي جاك لاتشوف وتصد
إرحم محبك لاتبيح بسده

***

صوتك حبيبي يطرد الجوع والبرد
أدخل على الله حبنا لا تهده

***

وأقول يالله ربنا يا لك الحمد
سمعت صوتك لو به شوي هده

الموضوع	كاتب الموضوع	المنتدى	مشاركات	آخر مشاركة
من ديوان الشاعر الامير محمد السديري	براق الجنوب	●{ذآئِقةً عَذبْــهـَ..~	12	16-06-2008 05:07 PM
الأبحار في سيرة وأشعار منـــــــــــــــادي (( سعد بن سعود بن محمد آل سعود	εïз..جَنْآئِنْ..εïз	●{ذآئِقةً عَذبْــهـَ..~	24	24-07-2007 08:27 PM

ملتقى الاماكن

الاماكن كلها مشتاقة !

« سجل دخولك للقسم بصورة شاعر..... | جيتك يومك طلبتيني »

الذين يشاهدون محتوى الموضوع الآن : 1 ( الأعضاء 0 والزوار 1)