هههههههههههههههههههههههههههههههه صبح صبح

الحين الموضوع مفروض تتكلمين عن أخوتس تقومين تسألين .. لكن تمونين مع هذا بأجاوبتس <<أصلا ما صدق أحد يسأله

بالنسبه للكرسي
كني جالس على كرسي حلاق هندي عليمي توهم جايبينه ... حدي بس اتلفت مدري وين بيجيني المقص معه

نبدا نجاوب أسئلة الاختبار .. بس لازم تصححين :

1\ايش اقرب كلمه لقلبكـ؟؟
أقرب كلمه .. هي كلمتين صراحه أكثر شي أقولها للي حولي .. وشلون الأمور؟ .. إذا بغيت أجرجر أحد وأخليه يسولف معي .. وأقصد علوم أخبار

الثانيه .. واللي مدري ليش أحس كني عجوز من كثر ما أقولها وهي .. الله يستر عليك .. أقولها لأي واحد يسألني أبغى شي وإلا خدمني في شي لو بسيط .. موب شرط يكون مودّع


2\مبدأ مستحيل يتغير عند سعدووون؟؟
المبدأ .. أو هي بمعنى أصح قناعة .. على نياتكم ترزقون .. يعني أبو نية غلب أبو نيتين وكلن بيعطيه ربي على قد نيته <<بالله وش الفرق؟
القصد إن النيه الطيبه دائماً ربي سبحانه ينصف راعيها في النهايه باللي يستحقه <<أقول رح للسؤال اللي بعده

الثاني .. احترام الآخرين .. فقناعتي أن احترام الآخر سيفرض عليه احترامك بالتأكيد !!


3\ في حياه لكل منا نقطه ضعف ماهي نقطه ضعفك ؟
نقطة الضعف اللي أشوفها بنفسي هي القلب الرهيّف زي ما يقولون في المواقف المحزنه .. سريع التأثر بالحالات الحزينه خصوصا إذا صار شي واقعي
يعني أدن البتسوه <<يعيـّط>> على طول ما تعوق معي إن شاالله فيلم هندي .. مدري ليه !!


4\ امنيه تمنيتها ولكن لم تتحقق؟؟؟
الأمنيه اللي ما تحققت .. بما إني تعلمت لغه إنجليزيه .. كان عندي نيه أتعلم الفرنسيه <<تبطي عظم>> وبديت فعلا في فتره من الفترات عن طريق التعلم الذاتي <<هذا اللي ضيعك>> عن طريق بعض الكتب والأشرطه .. بس حسيت إني كل ما بغيت أتكلم فرنسي كني أحتسي وفي فمي علك وإلا أتمضمض عشان كذا هونت <<نصاب ما عرف


5\ماذا تعني لك هذه الكلمات :
((( الام )))
الأم .. يا لبى قلبها بس حلوة اللبن .. هي الحياه .. هي كل شي في الدنيا .. مهما اخترنا من كلمات منمقه وجميله ومهما ألفنا من مجلدات في الأم ما راح توفيها حقها
يكفي أن .. الجنة تحت أقدام الأمهات .. ورضا الله من رضا الوالدين
هي بالنسبه لي كل شي .. الله يخليها لنا ويقدرنا على رد لو جزء بسيط من حقوقها علينا

((( الحياة )))
الحياه .. مراحل مختلفه نعيشها .. يتخللها الكثير من الأحداث والتجارب منها المحزن ومنها المفرح .. ولكنها ما تستاهل منا كل هالفتنه فيها .. لأنها في النهايه دار زوال
لكن الأفضل نحاول قد ما نستطيع ونجاهد أنفسنا بالعمل فيها باللي ينفعنا بعدها .. للآخره .. إذا لاقينا وجه ربنا عز وجل
الله يرحمنا برحمته ولا يكلنا لأنفسنا وأعمالنا طرفة عين

((( الحب )))
الحب .. كلمه من حرفين .. لكن معانيها ما تحصرها حروف اللغه كلها مجتمعه ..
أجمل حاله يمكن يعيشها قلب .. شعور ما له مثيل وأحاسيس ما تعرف شبيه إذا كان صادق ونابع من القلب بدون أي تصنع أو ابتذال ورتوش زائفه
مو شرط يكون حب بين عاشقين بس .. لكن أيضا حب الآخرين حولنا إذا صدقنا فيه تكون حياتنا مختلفه وإيجابيه بشكل كبير ونشوفها حلوه ومشوّقه

((( الصداقه )))
الصداقه .. علاقه نبيله بكل معنى الكلمه إذا انبنت على الصدق وكانت لله في الله مو لمصالح معينه .. كلنا نحتاج الصديق الوفي .. وأشوف إنها نادره في وقتنا الحالي لكن إذا توفق الواحد منا في صديق مخلص ووفي فهذي نعمه من الله لأنه أكيد بيكون عديل الروح وبمثابة الأخ فـ ..

رب أخٍ لم تلده أمك !!

((( الحرية )))
الحريه .. شعور جميل بالتخلص من قيود كثيره سواء اجتماعيه أو غيرها .. لكن يجب أن تكون عقلانيه وبحدود لا تتعدى حدود الدين والأدب وما نشأنا عليه من مبادئ وأخلاقيات !!

((( الفراق )))
الفراق .. ابتعاد عن من نحب بأسباب مختلفه .. لكن يبقى حاله صعبه تتصارع فيها الأحاسيس والمشاعر بين قناعة بحدوث النهايه وتعلق وجداني بمن سنفارقهم ..
وفي نهاية الأمر هو معاناة يعيشها من افترق عن أحبته بين أمل لقاء آخر قريب وبين صراع نفسي للتأقلم مع الوضع الجديد بدونهم !!

فهو أسوأ ما قد يمر به إنسان من معاناه في العواطف والأحاسيس !!

وأدعي ربي لي ولكم إنه ما يكتب لنا فراق من نحب .. إلا بالموت لأنه حق علينا جميعا وسنة الله في خلقه

6\عندكـ عشر وردات بكل بصراحه راح تقدمهاا لمين ؟؟<<طبعاا من المنتدى>>>
العشر وردات .. ما تكفي .. وما توفيكم حقكم كلكم .. وصعب أخصصها لأحد معين وربي الغالين كثيرين وعلشان محد يزعل بأصير انحيادي

وأنثرها على الجميع واللي تطيح عليه فهي من حظه <<وين في حفله

7\هل مر سعدووون بقصه حب وياليت تذكرهاا؟؟
هل مريت بحالة حب .. اممممممم أنواع الإحراج .. مع إنه سؤال شخصي بالمره .. لكن تمونين وبأحاول أجاوب

أولا ما فيه أحد منا إلا مر بحالة حب بغض النظر عن نوعها <<عارفين السؤال لك انت جاوب

صراحه إذا بنقيسها بحالات التخيل أو الوهم اللي يعيشها الواحد منا أحيانا في عالمه الحالم فبنقول كثيره .. لكنها طبعا في غالبها غير حقيقيه .. بمعنى إنها يا تكون من طرف واحد أو من باب التمني .. أو ما استوفت الشروط والعوامل اللي تخليها حالة حب فعليه فيها شعور صادق من الطرفين <<لا تلف وتدور هات الزبده <<شكلها ساحت

لكن في الحقيقه .. حالة حب حقيقيه نوعا ما .. كانت تجربه من فتره طويله جدا وما كتب الله إنها تستمر لأسباب وظروف معينه .. والحمد لله على كل شي .. انتهت بخيرها وشرها وتجاوزها أخوتس في النهايه بسلام وبأقل الخساير .. عاطفيا طبعا

حاليا .. في فمي ماء <<موب يتمضمض>> .. لكن القلب لازال أخضر <<ذبحتنا يالمنتخب>> ويعيش حالته مره أخرى وبشكل أنقى وأجمل .. وأيضا الحمد لله على كل شي


وشكلي أنا بعد طولت في الإجابه ومسكت بكم خط <<ما ينعطى وجه في الأسئله


الله يسعد قلبك يالغلا بكل خير ومحبه ويوفقك دنيا وآخره .. على تواجدك العذب بعذوبة أخلاقك وخفة دمك



دمتي بود وألف خير