يامحمد أجّلنا المبارات بالليل=ماهي بلحية لِعْب بوح الندى جات
هالحين وآنا آخوك عندي مواويل=ملزوم ألبّسها جميل العبارات
قم عطني الشّيشه وببسي وتشكيل=عشان أمزمز وآتفنّن بالأبيات
مستانس وطربان ..؟ قل منبسط حيل=أمشي وأوزّع للمخاليق بسمات
يامرحبا عد الحصى والهماليل=وإعداد مابالمملكه من عمارات
غبتي وجيتِ اليوم يامهرة الخيل=وأنا أحسب إنّه عودتك بالخيالات
كنّك ليا جيتي مثل نجمة إسهيل=تضوي وإذا غابت تغيب الإضاءات
يامنبعن للعز وأخت الحلاحيل=شموخ طاغي ياشموخ الأميرات
لايابعد ناسن رخوم ومهابيل=سبحان من خلّى العذارى مقامات
كم مرّتن يابوح عقب التعاليل=سألت لكن ماعطوني إجابات
يابوح دمعي في غيابك كما النيل=تعبت أقاوم ضيقتي بإبتسامات
يابوح والله كل أبوها غرابيل=أنا دخيلك لاتزيد الغيابات
لك منزلن بالقلب مايجرفه سيل=ودّن على وضح النقى والديانات
خوّت شرف ماهي بخوّة محابيل=وأشتاق لك شوق الشجر للسحابات
إقسم بإسم اللي كتب سورة الفيل=ماقلتها قصدي نفاق ودعايات
لكن شعور إنسان ماعاد به حيل=يكتم عن أصحابه شعور المسرّات