زرت الأماكن اتحرى عن الأخبار والغالين=حتى بغيابي .. ماغاب الشوق للشله
ولمحت اللي شدني عن باقي العناوين="خلودنا" تهني "بصيصنا" والوضع فله
بقدوم "فارس" أزهرت خضر البساتين=وابتهجت الأرواح وحل الفرح كله
"أم الفهد" مبروك ومعها مثلها ألفين=ولو ما وفى كثرها بحق "باهي الطله"
ولا هان "أبو الفهد" ربي يحميكم الاثنين=ويديم المحبه ويحفظ كل خلٍ لخله
بصيصٍ للأمل شمعه عساتس ما تطفين=أختٍ نقدرها وفيتس ما نقبل الزله
يا طيّبه تدرين اللي ما له غلا مسكين=ومن لا اغلوه المعارف أكيد به عله
وانتي غلاتس عندنا بسمو المضامين=على النقا واحترامتس استوطن محله
أدري رزينه ما يهمتس هرج المصاخين=وحنا بعد ما نلتفت لعقولٍ صابها خله
هذي رسالة أخوتس وتكفين لا تبطين=كل نفسٍ تعزتس من البعد معتله
الله يرزقتس بدنياتس كثر ما تعطين=وفـ الآخره ربي يجمعنا تحت ظله