أولاً .. أشكر أختي الفرس على نبل مشاعرها .. واختيارها لي كأول راعي ورد .. قصدي رد

مع إني ما استعديت لذا العزيمه ولا لبست ولا شي <<اللي يشوفك يقول رايح لعرس بثوب النوم >> أول ما دخلت لقيت الدعوه ودرعمت

وإن شا الله .. ما أكون ثقيل على البعض .. وأكون بشذى الورد لو مره << بدري عليك


بعدين يا كحيلان وأنا أخوك .. أعصابك .. بيجيك السرا
ووش أسوي طيب محلات الهدايا مقفله .. تخبر صيام .. فجبت لكم قلبي <<بدا شغل المصاريه >> بدال ما أخم أقرب ريحانه من أقرب حديقة بلديه وأجيبها


نجي للمقابله الشخصيه :

س/ وش تمثل لك الهدآيا لآجت من غالي؟

قطعه من الغالي نفسه
قصدي تمثل أجمل المعاني وأغلاها .. وأعتبرها جزء منه .. طالما هي من ذوقه واختياره .. ويكفي إنها هديه سيسبانه .. يعني سبيسيال .. سبيشل .. خاصه .. أي شي


س/ أحلى هدية تلقيتهآ وآغلاهآ؟ وش كآنت مناسبتهآ؟

الهدايا الحلوه كثيره .. خصوصا اللي من الوالدين (الله يطول بعمر والدتي على طاعته ويغفر لوالدي وموتى المسلمين) يكون لها طعم خاص
وطبعا فيه هدايا كثيره من أصدقاء وزملاء دراسه في فترات مختلفه

لكن أغلى هديه .. كانت سياره من الوالد (الله يرحمه) عشان نجحت في الثانويه .. وصدمت بها


س/ هل تهتم بالهدية كقيمه أو كمعنى ؟

أنظر للهديه بمعناها .. وليس قيمتها .. وما يمنع إذا كانت شي يستاهل << طلع الصدز
لأني أشوف معناها هو اللي يزيد قيمتها عندي .. وطبعا قيمة الشخص أكيد كبيره لأنه لو مو كذا ما أهدى/أهدت لي من الأساس ووفروا على أنفسهم


س/ عند بآئع الزهور بآقه فل لمن ستهديهآ؟

بأسوي استنساخ لذا الباقه عشان تصير ثنتين .. وحده لحلوة اللبن اللي يخليها .. والثانيه لقلب آخر يعرف نفسه
وإن ما حصل استنساخ .. بأقسمها نصين << وين جحه؟


س/ دائمآ عندمآ تريد أختيار هدية لتقدمهآ لشخص ما ماذا تحب أن تهدي؟

إذا ما كان شي رمزي <<رمزي والا فتحي كح كح>> زي ورد وإلا عطر مثلا .. أحب يكون شي يستفيد منه الشخص المهدى إليه .. وتكون هديه مناسبه له

موب مثلا واحد ما يلبس إلا ثياب ساده .. أقوم أهدي له كبك


س/ هل تلقيت هدية غريبة وماهي ؟

ههههههههههههههههه ايه تذكرت
مره يوم كنت أدرس برا .. كانوا فيه عائله مصادقيني مدري مصادقهم .. وسألوني مره عن تاريخ الميلاد وما دريت بعدها بفتره الا جايبين لي هدايا يقولون هابي بيرث داي تو يو

قلت وين في فيلم؟! << ما تعود على ذا الحركات

المهم جايبين طورطه مدري قاتوه .. وهدايا بسيطه بس حلوه .. وعندهم بنت وقتها عمرها 14 تقريبا .. جابت لي هديه دبدوب .. لو باشرت علي ببرندا أزين

يا أنا بغيت أشوّت في ذا الدب تشويت .. عاد رجلي تاكلني وانتم بكرامه مبطي ما لعبت كوره وقتها .. لكن الحيا واني اكسر بخاطرها خلاني اهجد وما أتهور .. وإلا أنا آخر عمري أشيل دببه

لو إنها جايبتن بداله ضب .. تسان أهون شوي

عاد هم ما دروا إن ذا التاريخ اللي عطيتهم موب صدز .. هو صدز في جواز السفر بس يختلف عن الهجري اللي انولدت فيه .. عشان الفرق بين الهجري والميلادي خخخخخخخخخخ

بس ولو عشت الجو معهم .. حسيت وقتها اسمي ويليام موب سعد


س/ من الشخص الذي تهدية دائمآ ؟

أكيد أمي الله يلبسها ثوب الصحه والعافيه


س/ أحلى عبآره قرأتهآ على هدية تلقيتهآ؟

You are my best friend & mean alot 2 me
أنت صديقي المفضل وتعني لي الشي الكثير

حسستني فعلا بمعنى الصداقه .. ومن بعدها ما عاد شفت ذا الصديق خخخخخخخ .. لا أمزح


س/ وآخيراً مالهدية التي تقدمهآ لآهل منتديات الامـاكن؟

آااه يالأماكن وأهلها .. وش يكفيكم من الهدايا بس؟ << قرب الآله الحاسبه بيشوف كم يخسر >> .. غلاكم أكبر من أي هدايا

بعدين هو فيه بينا هدايا لا سمح الله

فديت قلوبكم .. ما فيه هدايا يعني لا أحد ينتظر
ما لكم إلا قلب يشيلكم بداخله بكل محبه أخويه صادقه لله في الله .. فالشعور الصادق أبلغ من أي هديه ماديه

صح بعضكم بيقولون صرفنا .. لكن هذه الحقيقه .. فالأماكن وأهلها قصة عشق لا تنتهي


جمعنا الله وإياكم دائماً على محبته في الدنيا .. وفي جناته في الآخرة




كل الشكر مره أخرى لأختي الفرس .. والحين اختار أخي العزيز كحيلان11 .. خله يمسك بكم خط

فليتفضل الأخ كحيلان ويحاسب على الهدايا



يسعدكم ربي ويوفقنا وياكم في الدارين

دمتم بود وألف خير